कपिलवस्तु चैत २२ गते ।
सिमा क्षेत्रमार्फत हुन सक्ने लागूऔषध ओसारपसार, विष्फोटक पदार्थ तथा हातहतियारको अवैध प्रयोगलगायत अपराधिक गतिविधि नियन्त्रण तथा रोकथाम गर्ने उद्देश्यले कपिलवस्तुको कृष्णनगर सिमा क्षेत्रमा कडाइका साथ चेकजाँच गरिएको छ ।
जिल्ला प्रहरी कार्यालय कपिलवस्तु, इलाका प्रहरी कार्यालय कृष्णनगर तथा गौतमबुद्ध विमानस्थल सुरक्षा कार्यालय भैरहवा अन्तर्गत केनाइन (डग) शाखासहितको संयुक्त प्रहरी टोलीले ‘डग स्निफिङ’सहित शंकास्पद सवारी साधन तथा सार्वजनिक स्थलहरूमा निगरानी र चेकजाँच तीव्र पारेको हो ।
प्रहरीका अनुसार सिमा क्षेत्रमा हुने सम्भावित अपराधिक गतिविधि न्यूनीकरण गर्न नियमित रूपमा यस्ता संयुक्त अपरेसन सञ्चालन गरिँदै आएको छ । चेकजाँचका क्रममा सवारी साधन, यात्रु तथा सामानहरूको सूक्ष्म निरीक्षण गरिएको जनाइएको छ ।
सुरक्षा निकायले सिमा क्षेत्रको सुरक्षा व्यवस्थालाई थप प्रभावकारी बनाउन यस्ता अभियानलाई निरन्तरता दिइने जनाएको छ ।
Discussion about this post