बाँके वैशाख १७ गते ।
नेपाल चिकित्सक सङ्घका केन्द्रीय महासचिव डा. सञ्जीव तिवारीको नेतृत्वमा आएको टोलीले नेपालगन्जस्थित भेरी अस्पताल पुगेर चिकित्सकमाथि भएको दुर्व्यवहारसम्बन्धी घटनाको स्थलगत जानकारी लिएको छ।
टोलीले अस्पतालमा कार्यरत चिकित्सकहरूसँग भेटघाट गर्दै उनीहरूमाथि भएको दुर्व्यवहार, धम्की तथा असुरक्षासम्बन्धी विषयमा जानकारी लिएको भेरी अस्पतालका प्रमुख मेडिकल सुपरिन्टेन्डेन्ट डा. निराजन सुवेदीले जानकारी दिए।
उनका अनुसार महासचिव तिवारीले चिकित्सकहरूको अवस्था बुझ्दै निर्धक्क भएर सेवा दिन आग्रह गरेका छन्। साथै, चिकित्सकहरूको सुरक्षामा सरकारले आवश्यक सहयोग र संरक्षण उपलब्ध गराउने विश्वास व्यक्त गरिएको उनले बताए।
बाँकेको बैजनाथ गाउँपालिका–६ निवासी ६२ वर्षीया दिलसरा विकको उपचारका क्रममा मृत्यु भएपछि आक्रोशित आफन्तहरूले अस्पताल प्रशासन र चिकित्सकमाथि आक्रमणको प्रयास, धम्की तथा दुर्व्यवहार गरेका थिए। उक्त घटनामा प्रमुख मेडिकल सुपरिन्टेन्डेन्ट डा. सुवेदी, प्रमुख कन्सल्टेन्ट फिजिसियन डा. राजन पाण्डे, वरिष्ठ कन्सल्टेन्ट कार्डियोलोजिस्ट डा. विकास नेपाल लगायत लक्षित भएका थिए।
नेपाल चिकित्सक सङ्घले उपचार प्रक्रियामा असहमति भए कानुनी बाटो उपलब्ध हुँदाहुँदै चिकित्सकमाथि आक्रमण हुनु निन्दनीय भएको जनाएको छ। साथै, दोषीमाथि स्वास्थ्यकर्मी तथा स्वास्थ्य संस्थाको सुरक्षा सम्बन्धी ऐन, २०६६ (पहिलो संशोधन, २०७९) अनुसार कारबाही प्रक्रिया अघि बढाइएकोमा सङ्घले प्रशासनप्रति आभार व्यक्त गरेको छ।
घटनासम्बन्धी मुद्दामा अस्पताल प्रशासनले दुई जनाविरुद्ध जिल्ला प्रहरी कार्यालयमा किटानी जाहेरी दिएको छ। प्रहरीले सो घटनामा संलग्न बताइएका एक जना कुशल दर्लामीलाई पक्राउ गरेको जनाएको छ भने अर्का एक जनाको खोजी कार्य जारी रहेको छ।
उता मृतकका छोरा सुरेश विकले पनि चिकित्सकविरुद्ध किटानी जाहेरी दर्ता गराएका छन्। घटनापछि चिकित्सकहरूको आन्दोलनका कारण दुई दिन बन्द रहेको भेरी अस्पतालको ओपिडी सेवा बुधबार दिउँसोदेखि पुनः सञ्चालनमा आएको छ।
Discussion about this post