बाँके वैशाख १७ गते ।
बाँके जिल्लाका विभिन्न सरकारी तथा सामुदायिक वन क्षेत्रमा डढेलो फैलिन थालेपछि त्यसको नियन्त्रणका लागि गठन गरिएको ‘आगो नियन्त्रण दस्ता’ सक्रिय रूपमा परिचालन गरिएको छ।
डिभिजन वन कार्यालय बाँकेका अनुसार हरेक वर्ष दोहोरिने डढेलो नियन्त्रणलाई लक्षित गर्दै १४ सदस्यीय आगो नियन्त्रण दस्ता गठन गरी तालिमसहित तयारी अवस्थामा राखिएको थियो। हाल जिल्लाका १४ वटा वन क्षेत्रमा डढेलो लागेको र त्यसलाई नियन्त्रण गर्न सामुदायिक वनका पदाधिकारी, उपभोक्ता तथा दस्ता संयुक्त रूपमा खटिएका छन्।
डिभिजन वन कार्यालय बाँकेका प्रमुख शंकरप्रसाद गुप्ताले जोखिमयुक्त क्षेत्र पहिचान गरेर दस्ता परिचालन गरिएको जानकारी दिए। विशेष गरी शम्शेरगञ्ज क्षेत्र र सिक्टा सब–डिभिजन वन कार्यालयअन्तर्गत पर्ने भूवरभवानी चक्ला वन क्षेत्रमा नियन्त्रण कार्य तीव्र पारिएको उनले बताए।
उनका अनुसार डढेलो नियन्त्रणसँगै जनचेतनामूलक कार्यक्रम पनि सञ्चालन भइरहेको छ। वन उपभोक्ता महासंघसँगको समन्वयमा विभिन्न सचेतनामूलक गतिविधि अघि बढाइएको छ। साथै दुई हजार लिटर क्षमताको ट्याक्टर–आधारित वारुणयन्त्र तयारी अवस्थामा राखिएको छ।
प्रमुख गुप्ताले उपलब्ध स्रोत र साधनका आधारमा निरन्तर रूपमा नियन्त्रण प्रयास भइरहेको उल्लेख गर्दै आगलागी भएका स्थानमा पुगेर दस्ता उद्धार तथा नियन्त्रण कार्यमा संलग्न रहेको बताए।
कार्यालयका अनुसार जिल्लामा खटिएका ‘अग्नि नियन्त्रण हेरालु’ हरूले पनि योजनाबद्ध रूपमा आगलागी रोकथाममा काम गरिरहेका छन्। शम्शेरगञ्ज र सिक्टा क्षेत्रमा छ–छ जना हेरालु परिचालन गरिएको छ।
फायरलाइन व्यवस्थापनलाई पनि प्राथमिकता दिइएको छ। हालसम्म जिल्लामा १०० किलोमिटर फायरलाइन रहेकोमा त्यसलाई विस्तार गरी १२० किलोमिटर पुर्याइएको कार्यालयले जनाएको छ।
यस्तै, शम्शेरगञ्ज क्षेत्रमा २५ लाख रुपैयाँको लागतमा २० हजार लिटर क्षमताको ओभरहेड पानी ट्याङ्की निर्माण गरिएको छ, जसले डढेलो नियन्त्रणमा सहयोग पुग्ने अपेक्षा गरिएको छ।
डिभिजन वन कार्यालय बाँकेका अनुसार हाल जिल्लाका सरकारी तथा सामुदायिक गरी १४ वटा वनमा लागेको डढेलोका कारण करिब ४ हजार ५०० हेक्टर वन क्षेत्र प्रभावित भएको छ।
Discussion about this post