बाँके वैशाख १७ गते ।
सार्वजनिक सवारी साधनमा आफुखुशी हुड जडान गरी यात्रु ओसारपसार गर्ने तथा अत्यधिक सरसामान बोक्ने गरेको जनगुनासो बढेपछि जिल्ला ट्राफिक प्रहरी कार्यालय बाँकेले ट्राफिक निगरानी कडा बनाएको छ।
बिहीबार कार्यालय प्रमुखसहितको टोलीले नेपालगन्ज–सुर्खेत रत्न राजमार्ग सडकखण्डमा विशेष ट्राफिक चेकजाँच सञ्चालन गरेको थियो। चेकजाँचका क्रममा ट्राफिक नियम उल्लङ्घन गर्ने १५७ वटा सवारी साधनलाई नियन्त्रणमा लिई कारबाही गरिएको छ।
कारबाहीका क्रममा नियमविपरीत जडान गरिएका हुड तथा अतिरिक्त सिट हटाउन लगाइएको छ। साथै, सवारी चालकलाई ट्राफिक नियमको पूर्ण पालना गर्न सचेत गराउँदै आवश्यक कारबाहीपछि सवारी साधन सञ्चालन गर्न अनुमति दिइएको छ।
जिल्ला ट्राफिक प्रहरी कार्यालय बाँकेका प्रमुख प्रहरी निरीक्षक कनकबहादुर शाहीले सार्वजनिक सवारी साधनमा मनपरी संरचना परिवर्तन गर्दा यात्रुको सुरक्षामा गम्भीर जोखिम पर्ने भएकाले यस्ता कार्य नियन्त्रणमा कडाइ गरिएको बताए। उनले नियम उल्लङ्घन गर्ने सवारीमाथि आगामी दिनमा अझ कडा अनुगमन र कारबाही गरिने पनि जानकारी दिए।
प्रहरीले सबै सवारी चालक तथा व्यवसायीलाई नियमअनुसार सुरक्षित र व्यवस्थित रूपमा सवारी सञ्चालन गर्न आग्रह गरेको छ।
Discussion about this post