बाँके जेठ २ गते ।
विश्व सडक सुरक्षा सप्ताहको अवसर पारेर नेपालगन्जमा यात्रुवाहक सार्वजनिक सवारी साधनका चालक तथा सहचालकहरुको स्वास्थ्य परीक्षण शिविर सञ्चालन गरिएको छ ।
जिल्ला ट्राफिक प्रहरी कार्यालय बाँके र जिल्ला प्रहरी कार्यालय बाँकेको संयुक्त आयोजनामा तथा लुम्बिनी प्रदेश प्रहरी अस्पताल नेपालगन्जको सहकार्यमा नेपालगन्ज बसपार्कमा शनिवार आयोजित उक्त शिविरमा करिब १५० जना चालक तथा सहचालकहरुको स्वास्थ्य परीक्षण गरिएको हो ।
सडक सुरक्षालाई नियम पालना र सवारी साधनको अवस्थासँग मात्र नभई चालकको शारीरिक तथा मानसिक स्वास्थ्यसँग पनि प्रत्यक्ष रुपमा जोडेर हेरिनुपर्ने सन्देश प्रवाह गर्ने उद्देश्यले कार्यक्रम गरिएको जिल्ला ट्राफिक प्रहरी कार्यालय बाँकेका प्रमुख प्रहरी निरीक्षक कनक बहादुर शाहीले बताए । सार्वजनिक सवारीका चालकहरु दिनहुँ सयौं यात्रुको जीवन सुरक्षासँग प्रत्यक्ष जोडिने भएकाले उनीहरुको स्वास्थ्य अवस्था सुरक्षित हुनु अत्यन्त आवश्यक रहेकोमा उनले बताए ।
ट्राफिक प्रमुख शाहीले चालक र सहचालकहरु सार्वजनिक सुरक्षाका संवेदनशील जिम्मेवारी बोकेका व्यक्ति भएकाले उनीहरुको स्वास्थ्यप्रति समयमै ध्यान दिनु अपरिहार्य रहेको बताए । उनले भने–‘सडक दुर्घटना न्यूनीकरण गर्न ट्राफिक नियम पालनासँगै चालकको स्वास्थ्य अवस्था पनि उत्तिकै महत्वपूर्ण पक्ष हो ।
स्वस्थ चालकले मात्रै सुरक्षित यात्रा सुनिश्चित गर्न सक्छ । त्यसैले हामीले विश्व सडक सुरक्षा सप्ताहलाई औपचारिक कार्यक्रमका रुपमा होइन, व्यवहारिक सचेतना अभियानका रूपमा अघि बढाएका छौं ।’ उनका अनुसार शिविरमा चालक तथा सहचालकहरुको सुगर, रक्तचाप (प्रेसर), सामान्य शारीरिक अवस्था लगायतका विभिन्न स्वास्थ्य परीक्षण गरिएको थियो । परीक्षणसँगै उनीहरुलाई आवश्यक स्वास्थ्य परामर्श सेवा पनि प्रदान गरिएको उनले जानकारी दिए । लामो समयसम्म लगातार सवारी चलाउँदा हुने थकान, अनियमित खानपान, तनाव तथा निद्राको कमीले चालकको स्वास्थ्यमा प्रत्यक्ष असर पार्ने भएकाले नियमित स्वास्थ्य परीक्षण आवश्यक रहेको उनको भनाइ थियो ।
प्रहरी निरीक्षक डा. नितु भण्डारीको नेतृत्वमा लुम्बिनी प्रदेश प्रहरी अस्पताल नेपालगन्जको चिकित्सक टोलीले स्वास्थ्य परीक्षण गरेको थियो । टोलीले चालकहरुलाई स्वास्थ्यप्रति सजग रहन, नियमित परीक्षण गर्न, पर्याप्त आराम लिन तथा सुरक्षित यात्राका लागि स्वस्थ जीवनशैली अपनाउन सुझाव दिएको थियो ।
कार्यक्रमका क्रममा प्रमुख शाहीले विश्व सडक सुरक्षा सप्ताह अन्तर्गत सन्चालन गरिने आगामी कार्यक्रमबारे पनि जानकारी दिएका छन् । उनले भने–‘आज सार्वजनिक सवारी साधनका चालक तथा सहचालकहरुको स्वास्थ्य परीक्षण गरियो । भोलि आइतवार सडक डिभिजन कार्यालय र यातायात व्यवस्था कार्यालयसँगको सहकार्यमा सार्वजनिक सवारी साधनहरुको यान्त्रिक परीक्षण गरिनेछ भने पर्सि सोमवार चालकहरुको लागुऔषध सेवन परीक्षण (लापसे चेकजाँच) कार्यक्रम सञ्चालन हुनेछ ।’
उनले यी सम्पूर्ण कार्यक्रमको मुख्य उद्देश्य चालकहरुलाई स्वास्थ्य, अनुशासन र जिम्मेवारीप्रति अझ संवेदनशील बनाउनुका साथै सडक दुर्घटना न्यूनीकरणमा ठोस योगदान पु¥याउनु रहेको स्पष्ट पारे । विश्व सडक सुरक्षा सप्ताह अन्तर्गत बैशाख ३० गतेदेखि जेठ ५ गतेसम्म विभिन्न जनचेतनामूलक कार्यक्रम संचालन भइरहेका छन् । यस अभियानमार्फत सडक दुर्घटना न्यूनीकरण, सुरक्षित यात्राका लागि चालक र यात्रु दुवैलाई जिम्मेवार बनाउन विशेष जोड दिइएको छ ।
Discussion about this post