बाँके, जेठ १२ गते ।
इलाका प्रहरी कार्यालय कोहलपुर, बाँकेले अदालतबाट एक करोड रुपैयाँभन्दा बढी जरिवाना तथा कैद सजाय तोकिएर फरार रहेका एक व्यक्तिलाई पक्राउ गरेको छ ।
पक्राउ पर्नेमा कोहलपुर नगरपालिका–१० निवासी ३४ वर्षीय कुलिन भन्ने अविनाश राना रहेका छन् । विभिन्न मुद्दामा बाँके जिल्ला अदालतबाट कैद तथा बिगो–जरिबाना सजाय सुनाइएपछि उनी लामो समयदेखि फरार रहेका थिए ।
इलाका प्रहरी कार्यालय कोहलपुरका सूचना अधिकारी प्रहरी निरीक्षक रामनारायण गुप्ताका अनुसार रानाविरुद्ध बाँके जिल्ला अदालतले विभिन्न समयमा बैंकिङ कसुर तथा चेक अनादरसम्बन्धी मुद्दामा सजाय फैसला गरेको थियो ।
प्रहरीका अनुसार २०८१ माघ २८ गते बैंकिङ कसुर मुद्दामा रानालाई दुई महिना कैद र एक करोड ३० लाख रुपैयाँ जरिवाना तोकिएको थियो । त्यसैगरी २०८२ वैशाख ८ गते अर्को बैंकिङ कसुर मुद्दामा नौ दिन कैद तथा १६ लाख ५० हजार रुपैयाँ जरिवाना फैसला भएको थियो ।
यस्तै, २०८२ जेठ २० गते चेक अनादर मुद्दामा उनलाई दुई वर्ष कैद सजाय सुनाइएको प्रहरीले जनाएको छ । अदालतको फैसला पश्चात् उनी फरार रहँदै आएका थिए ।
सोमबार इलाका प्रहरी कार्यालय कोहलपुरबाट खटिएको प्रहरी टोलीले रानालाई पक्राउ गरी आवश्यक कारबाहीका लागि बाँके जिल्ला अदालतमा पेस गरेको प्रहरीले जनाएको छ ।
Discussion about this post