बाँके, जेठ ११ गते ।
दुर्घटना न्युनीकरणका लागि बाँके ट्राफिकले सक्रियता बढाएको छ । त्यसका लागि जिल्ला ट्राफिक प्रहरी कार्यालय बाँकेले नेपालगन्ज बसपार्कबाट छुट्ने छोटो तथा लामो दूरीका सवारीसाधन चालकहरूको मादक पदार्थ सेवन (मापसे) परीक्षण सुरु गरेको हो । यो अभ्यास बाँकेमा पहिलोपटक सुरु भएको हो । अब चालकले मापासे परीक्षण नगरी सवारीसाधन लिएर यात्रा सुरु गर्न पाउने छैनन् ।
अस्थायी ट्राफिक प्रहरी पोस्ट नेपालगन्ज बसपार्कका इन्चार्ज प्रहरी सहायक निरीक्षक प्रकाश विकका अनुसार विशेषगरी साँझको समयमा छुट्ने सवारीसाधनका चालकलाई लक्षित गरेर नियमित जाँच थालिएको हो । “मादक पदार्थ सेवन गरेर सवारी चलाउँदा दुर्घटनाको जोखिम बढिरहेको छ उनले भने, “त्यसैले बसपार्कबाटै चालकको अवस्था परीक्षण गरेर मात्रै गाडी छुटाउने व्यवस्था मिलाएका छौं ।”
पछिल्ला वर्षहरुमा सडक दुर्घटनाका घटनामा वृद्धि भइरहेका बेला चालकको लापरबाही र मादक पदार्थ सेवन मुख्य कारणमध्ये एक बन्दै गएको प्रहरीको निष्कर्ष छ । विशेषगरी रातिको समयमा लामो दूरीका बस दुर्घटना हुने क्रम बढेपछि प्रहरी सक्रिय रूपमा निगरानीमा जुटेको हो ।
यातायात व्यवसायीहरू पनि प्रहरीको अभियानप्रति सकारात्मक देखिएका छन् । जय श्री यातायात प्रालिका व्यवसायी दीपेन्द्र बुढाले बसपार्कमै चालकको परीक्षण हुँदा यात्रु र व्यवसायी दुवैलाई फाइदा पुग्ने बताए । “चालकले मापासे गरेको छ वा छैन भन्ने कुरा सुरुबाटै स्पष्ट हुन्छ, उनले भने, “यसले यात्रुलाई ढुक्क बनाउँछ भने बीच बाटोमा हुने सम्भावित दुर्घटना न्यूनीकरणमा पनि सहयोग पुग्छ ।” चालकहरूले समेत यस्तो जाँच नियमित हुनुपर्ने माग गर्न थालेका छन् । उनीहरूका अनुसार नियम सबैका लागि समान रूपमा लागू हुँदा जिम्मेवारी र अनुशासन दुवै बढ्नेछ।
जिल्ला ट्राफिक प्रहरी कार्यालय बाँकेका प्रमुख प्रहरी निरीक्षक कनकबहादुर शाहीले दुर्घटना न्यूनीकरणलाई प्राथमिकतामा राख्दै अभियान सुरु गरिएको बताए । “यो एक दिनको कार्यक्रम होइन उनले भने, “अब दैनिक रूपमा नियमित निगरानी र मापासे परीक्षण सञ्चालन हुन्छ ।” बाँकेमा ट्राफिक प्रहरी र नेपाल प्रहरीले संयुक्त रुपमा केही दिन अघि गरेको चेकजाँचमा अधिकांश चालकहरुले लागु पदार्थ सेवन गरेर सवारी साधन चलाएको पाइएको थियो ।
Discussion about this post