बाँके जेठ १२ गते ।
पश्चिम नेपालको बाँके, बर्दिया, कैलाली लगायतका जिल्लामा अत्यधिक गर्मीका कारण ‘हिटस्ट्रोक’को जोखिम बढेपछि नेपालगन्जस्थित भेरी अस्पताललाई २४सै घण्टा ‘हाइ अलर्ट’मा राखिएको छ ।
प्रचण्ड गर्मीका कारण जनजीवन प्रभावित बन्दै गएपछि सम्भावित स्वास्थ्य जोखिमलाई मध्यनजर गर्दै अस्पताललाई उच्च सतर्कतामा राखिएको अस्पतालका मेडिकल सुपरिन्टेन्डेन्ट डा. नवीन दर्नालले जानकारी दिए ।
उनका अनुसार बाँके क्षेत्रमा अत्यधिक तापक्रम वृद्धि हुने भएकाले हिटस्ट्रोकको जोखिम उच्च रहेको छ । त्यसका लागि इमरजेन्सी म्यानेजमेन्ट टिमलाई २४सै घण्टा तयारी अवस्थामा राखिएको उनले बताए ।
पछिल्ला केही दिनयता अस्पतालमा गर्मीजन्य रोगका बिरामीको संख्या बढ्दै गएको छ । टाउको दुख्ने, वाकवाकी लाग्ने, बान्ता हुने, शरीरमा पानीको कमी हुने तथा ज्वरो आउने समस्या भएका बिरामी निरन्तर अस्पताल पुगिरहेको डा. दर्नालले बताए ।
चर्को गर्मीका कारण घमौरा आउने, डिहाइड्रेसन हुने, फुड प्वाइजनिङ हुने तथा आँखामा एलर्जी र संक्रमण देखिने जोखिम समेत बढेको चिकित्सकहरूले बताएका छन् । उनीहरूले दिउँसोको समयमा अनावश्यक रूपमा घर बाहिर ननिस्कन र पर्याप्त पानी पिउन सर्वसाधारणलाई आग्रह गरेका छन् ।
भेरी अस्पतालका सूचना अधिकारी तथा वरिष्ठ फिजिसियन डा. संकेतकुमार रिसालले लगातार उच्च ज्वरो आउने, बेहोस हुने, सास फेर्न गाह्रो हुने वा लगातार बान्ता भइरहने जस्ता समस्या देखिए तत्काल नजिकको स्वास्थ्य संस्थामा पुग्न आग्रह गरे ।
हालको प्रचण्ड गर्मीबाट विशेषगरी किसान, निर्माण मजदुर तथा दैनिक ज्यालादारी काम गर्ने श्रमिकहरू बढी प्रभावित भएका छन् । अस्पतालमा आउने अधिकांश बिरामी मजदुरी गर्ने वर्गका रहेको अस्पतालले जनाएको छ ।
यसैबीच, जल तथा मौसम विज्ञान विभागअन्तर्गतको मौसम पूर्वानुमान महाशाखाले लुम्बिनी प्रदेशका तराई जिल्लामा अझै केही दिन तातो हावा तथा लु चल्ने चेतावनी जारी गरेको छ ।
Discussion about this post