बाँके, भदौ ५ गते ।
बाँकेको खजुरास्थित सुशील कोइराला प्रादेशिक क्यान्सर अस्पतालमा लामो समयदेखि बिग्रिएर थन्किएका ४४ वटा स्वास्थ्य उपकरण मर्मत गरेर सञ्चालनमा ल्याइएको छ । उपकरण सञ्चालनमा आएपछि अस्पतालको उपचार सेवा सहज भएको छ ।
अस्पतालका कार्यकारी निर्देशक डा. नीरज भट्टराईले लामो समयदेखि प्रयोगविहीन रहेका महत्त्वपूर्ण उपकरण मर्मत गरेर सञ्चालनमा ल्याएपछि बिरामीलाई उपचारमा सहज भएको बताए ।
उनका अनुसार उपकरण मर्मतका लागि राष्ट्रिय आविष्कार केन्द्रसँग सम्झौता गरिएको थियो । सम्झौताअनुसार केन्द्रको प्राविधिक टोली अस्पतालमा आएर ४४ वटा उपकरण मर्मत गरेर फर्किएको उनले बताए ।
अस्पतालमा लामो समयदेखि बिग्रिएर थन्किएका ६० वटा उपकरणमध्ये ४४ वटा मर्मत गरिएको अस्पतालले जनाएको छ । मर्मत गरिएका उपकरणमा दुईवटा एक्सरे मेसिन, एउटा अल्ट्रासाउन्ड मेसिन, तीनवटा भेन्टिलेटर, एउटा एनेस्थेसिया मेसिन, एउटा केमो क्याबिनेट, माइक्रोस्कोप र ल्याप्रोस्कोपी टावरलगायत छन् ।
अस्पतालका सूचना अधिकारी डा. प्रवीण गुप्ताले उपकरण सञ्चालनमा आएपछि एक्सरे, अल्ट्रासाउन्डलगायतका परीक्षणका लागि बिरामीलाई बाहिर पठाउनुपर्ने अवस्था हटेको बताए ।
क्यान्सर रोगको परीक्षण तथा उपचारमा प्रयोग हुने विभिन्न उपकरण सञ्चालनमा आएपछि अस्पतालमै सेवा दिन सहज भएको उनले बताए ।
खजुरा गाउँपालिकाका पूर्वअध्यक्ष किस्मतकुमार कक्षपतिले लामो समयदेखि बिग्रिएका उपकरण मर्मत भएपछि बिरामीले सामान्य परीक्षणका लागि समेत बाहिर जानुपर्ने बाध्यता हटेको बताए ।
गत साउनको पहिलो साता राष्ट्रिय आविष्कार केन्द्रका बायोमेडिकल टिम लिडर इन्जिनियर उमेश किरातको नेतृत्वमा पाँच सदस्यीय प्राविधिक टोली अस्पताल पुगेको थियो । टोलीले अस्पतालमा रहेका बिग्रिएका उपकरणको परीक्षण गरी ४४ वटा उपकरण मर्मत गरेको थियो ।
Discussion about this post