बाँके, असोज २३ गते।
बाँकेमा हालसम्म ९० जनामा डेंगु संक्रमण पुष्टि भएको छ। भेरी अस्पताल नेपालगन्ज, सञ्जीवनी अस्पताललगायतका स्वास्थ्य संस्थामा गरिएको परीक्षणका क्रममा उनीहरूमा संक्रमण पुष्टि भएको स्वास्थ्य कार्यालय बाँकेका मलेरिया फोकल पर्सन रत्नप्रसाद शर्माले बताए।
डेंगु संक्रमणको जोखिम न्यूनीकरण गर्न नेपालगन्ज उपमहानगरपालिकाले नगरका २३ वटै वडामा लामखुट्टेको लार्भा नष्ट गर्ने अभियान सञ्चालन गर्ने भएको छ। घर तथा समुदाय वरिपरि पानी जम्ने स्थानमा डेंगु सार्ने लामखुट्टेको बासस्थान खोजी गरी लार्भा नष्ट गरिने जनस्वास्थ्य प्रवद्र्धन शाखा प्रमुख जागेश्वर बस्नेतले बताए।
जनस्वास्थ्य अधिकृतसमेत रहेका कीटजन्य रोगका सम्पर्क व्यक्ति सरोज रिमालका अनुसार अभियान केही दिनभित्रै सञ्चालन गर्ने तयारी गरिएको छ। त्यसका लागि सम्बन्धित सरोकारवालासँग छलफलसमेत गरिएको उनले बताए।
अभियानका क्रममा घर तथा समुदाय वरिपरि जमेको पानी, गमला, एसी, कुलरलगायत पानी जम्मा हुने स्थानमा लामखुट्टेको बासस्थान र लार्भा खोजी गरी नष्ट गरिनेछ। यस्ता स्थानमा पानी जम्न नदिन र लामखुट्टेको प्रजनन रोक्न अभियान केन्द्रित हुने जनाइएको छ।
विगतमा सञ्चालन गरिएको ‘खोज र नष्ट गर’ अभियानपछि डेंगु संक्रमण घटेको अनुभवका आधारमा यस वर्ष पनि अभियान सञ्चालन गर्न लागिएको रिमालले बताए।
डेंगु सार्ने लामखुट्टे कात्तिक–मंसिरसम्म सक्रिय रहने भएकाले जोखिम न्यूनीकरणका लागि त्यसअघि नै अभियानलाई प्रभावकारी रूपमा सञ्चालन गर्ने तयारी गरिएको उपमहानगरपालिकाले जनाएको छ।
Discussion about this post