बाँके भदौ १० गते ।
मोहम्मद डे मनाउने क्रममा नेपालगन्जको बीपी चोक आसपास वितरण गरिएको पानी तथा फलफूलबाट निस्किएको फोहोर श्रम संस्कृति पार्टी बाँकेले संकलन गरी व्यवस्थापन गरेको छ।
मोहम्मद डेको अवसरमा सर्वसाधारण तथा र्यालीमा सहभागीलाई पानी र फलफूल वितरण गरेको पार्टीले कार्यक्रम सकिएपछि बीपी चोक आसपासको सडक क्षेत्रमा सरसफाइ गरेको हो।
सरसफाइका क्रममा सडक तथा आसपासबाट करिब २५ झोला प्लास्टिकजन्य फोहोर संकलन गरिएको जिल्ला संगठन विभाग प्रमुख राजन राना मगरले बताए। उनका अनुसार कार्यक्रमबाट निस्किएको फोहोर व्यवस्थापन गर्नु पनि आयोजकको जिम्मेवारी भएकाले पार्टीका नेता तथा कार्यकर्ता सरसफाइमा जुटेका हुन्।
‘सेवा गर्ने नाममा फोहोर छाडेर जाने होइन, आफूले गरेको कार्यक्रमबाट निस्किएको फोहोर आफैं व्यवस्थापन गर्नुपर्छ भन्ने सन्देश दिन खोजेका हौं,’ उनले भने।
पार्टीले धार्मिक तथा सांस्कृतिक अवसरलाई सामाजिक उत्तरदायित्वसँग जोड्दै सेवा, सद्भाव र सरसफाइको सन्देश दिन अभियान सञ्चालन गरिएको जनाएको छ।
सरसफाइमा श्रम संस्कृति पार्टी बाँकेका अध्यक्ष श्रीमान् थापा मगर, जिल्ला संगठन विभाग प्रमुख राजन राना मगर, वरिष्ठ नेता मोहम्मद इम्तियाज राई, कस्मिरा खातुनलगायत नेता तथा कार्यकर्ताको सहभागिता थियो।
मोहम्मद डेको अवसरमा नेपालगन्जमा आयोजित र्यालीमा सहभागी सर्वसाधारण तथा भक्तजनलाई विभिन्न राजनीतिक दल, संघसंस्था तथा व्यवसायिक प्रतिष्ठानले पानी, सरबत, बिस्कुट, मिठाईलगायत सामग्री वितरण गरेका थिए। वितरणपछि सडक तथा सार्वजनिक स्थलमा थुप्रिएको फोहोर व्यवस्थापन गर्नुपर्ने देखिएपछि श्रम संस्कृति पार्टीले सरसफाइ गरेको जनाएको छ।
Discussion about this post