बाँके, भदौ १० गते ।
सामाजिक सद्भाव, धार्मिक सहिष्णुता र दिगो शान्तिको कामना गर्दै नेपालगन्जमा इस्लाम धर्मावलम्बीहरूले मोहम्मद डे मनाएका छन्।
नेपालगन्जका विभिन्न स्थानबाट भेला भएका इस्लाम धर्मावलम्बीहरूले शान्ति, सहिष्णुता र आपसी सम्मानबाट मात्रै दिगो सामाजिक सद्भाव कायम गर्न सकिने बताएका छन्।
यस वर्षको मोहम्मद डेमा विगतका वर्षहरूमा जस्तो ठूलो आवाजमा डिजे तथा बाजा प्रयोग नगरिएपछि र्याली शान्त र सभ्य देखिएको थियो। र्यालीको यो शैलीको गैरमुस्लिम समुदायका व्यक्तिहरूले समेत प्रशंसा गरेका छन्।
सामाजिक अभियन्ता मिनबहादुर मल्लले यस वर्षको मोहम्मद डे शान्त र सभ्य रूपमा सम्पन्न भएको बताए। “यस वर्षको मोहम्मद डे भव्य र शान्त भएको पाएँ,” उनले भने, “ठूलो आवाजमा डिजे बजाइएन। यसले गैरमुस्लिम समुदायलाई समेत सकारात्मक सन्देश दिएको छ।”
मोहम्मद डेका अवसरमा आयोजित र्यालीमा गैरमुस्लिम समुदायका व्यक्तिहरूले समेत सहभागिता जनाएका थिए। सामाजिक तथा धार्मिक सद्भावको सन्देश दिन विभिन्न स्थानमा र्यालीमा सहभागीलाई पानी, मिठाई, जुस र बिस्कुट वितरण गरिएको थियो।
समाजसेवी तथा दन्त चिकित्सक डा. प्रतीक श्रेष्ठले एक धर्मावलम्बीले अर्को धर्मको सम्मान गर्दा सामाजिक तथा धार्मिक सद्भाव अझ बलियो हुने बताए। “एउटा धर्म मान्नेले अर्को धर्मको सम्मान गर्दा सामाजिक एवं धार्मिक सद्भाव बलियो बन्छ,” उनले भने, “यस्ता कार्यबाट मात्रै दिगो शान्तिको परिकल्पना गर्न सकिन्छ।”
डा. श्रेष्ठले र्यालीमा सहभागी इस्लाम धर्मावलम्बीलाई पानी, जुस र बिस्कुट वितरण गरेका थिए।
नेपालगन्ज उपमहानगरपालिका–१८ का वडाध्यक्ष दीपक वर्माले पनि र्यालीमा सहभागीलाई मिठाई र पानी वितरण गरेका थिए। बीपी चोकमा पुगेर उनले सहभागीलाई सामग्री वितरण गर्दै सामाजिक तथा धार्मिक सद्भाव कायम गर्न सबै समुदायको भूमिका महत्वपूर्ण हुने बताए।
“दिगो शान्तिका लागि सामाजिक सद्भाव बलियो हुनुपर्छ,” वर्माले भने, “दिगो शान्तिले समृद्धि र विकासमा समेत टेवा पुर्याउँछ।”
नेपालगन्ज–७ निवासी मुस्लिम अगुवा तथा जामा मस्जिदका पूर्वउपाध्यक्ष मोहम्मद जियाउल हकले सामाजिक सद्भाव, देशवासीको सुख, शान्ति र समृद्धिको कामना गर्दै र्यालीमा सहभागी भएको बताए।
उनले यस वर्षको र्याली विगतको तुलनामा थप सभ्य र व्यवस्थित भएको बताए। “सिंगो देशवासीको सुख, शान्ति, समृद्धि र दिगो शान्तिको कामना गरेका छौँ,” उनले भने।
मोहम्मद डेमा देखिएको शान्तिपूर्ण र्याली, विभिन्न समुदायको सहभागिता तथा आपसी सम्मानका गतिविधिले नेपालगन्जको धार्मिक तथा सामाजिक सद्भावको सन्देशलाई थप बलियो बनाएको सहभागीहरूले बताएका छन्।
Discussion about this post