बाँके, असोज २२ गते ।
बुधबार परेको वर्षा र हावाहुरीले बाँकेमा पाकेर भित्र्याउने तयारीमा रहेको धानबालीमा क्षति पुर्याएको छ। जिल्लाका विभिन्न स्थानमा धान ढलेपछि किसानलाई बाली स्याहार्न समस्या भएको छ।
राप्ती सोनारीमा हावाहुरीसहितको वर्षाले बीउ धानमा ठूलो क्षति पुर्याएको साकार कृषि सहकारी संस्थाका व्यवस्थापक जमानसिंह वलीले बताए। उनका अनुसार सहकारीमार्फत किसानले लगाएको करिब १५० बिघा बीउ धानमा वर्षाले क्षति पु¥याएको छ।
‘बीउ धान स्याहार्ने बेला वर्षा भयो। पाकेको धान ढलेपछि ठूलो क्षति भएको छ,’ वलीले भने, ‘यसले आगामी वर्षका लागि बीउ धानको अभाव हुन सक्ने अवस्था देखिएको छ।’
सहकारीले किसानलाई बीउ उपलब्ध गराउँदै आएको छ। किसानले उत्पादन गरेको बीउ धान सहकारीलाई बिक्री गर्ने गरेका छन्। यो वर्ष पर्याप्त वर्षा भएकाले धान उत्पादन राम्रो भए पनि भित्र्याउने बेलामा वर्षाले क्षति पु¥याएको वलीले बताए।
कृषि ज्ञान केन्द्र बाँकेकी सूचना अधिकारी सुजिता शर्माले पाकेर थन्क्याउने तयारीमा रहेको धानमा वर्षाले क्षति पु¥याएको बताइन्। उनका अनुसार जिल्लाका विभिन्न स्थानबाट धानबालीमा क्षति पुगेको जानकारी आए पनि क्षतिको यकिन विवरण भने संकलन भइसकेको छैन।
‘पाकेको धान भित्र्याउने बेलामा वर्षा भएकाले धेरै ठाउँमा क्षति पुगेको जानकारी आएको छ,’ शर्माले भनिन्, ‘क्षतिको विवरण संकलन भइरहेको छ। यकिन तथ्यांक आएपछि मात्रै क्षतिको अवस्था स्पष्ट हुन्छ।’
बाँकेमा कुल ५४ हजार ५२६ हेक्टर खेतीयोग्य जमिनमध्ये ३३ हजार ५७० हेक्टरमा धान खेती हुने गरेको छ। यस वर्ष ३३ हजार ५०३ हेक्टर क्षेत्रफलमा धान रोपाइँ भएको शर्माले बताइन्।
Discussion about this post