बाँके, कात्तिक २२ गते ।
खाद्य व्यवस्था तथा व्यापार कम्पनी लिमिटेडले यस वर्ष धान खरिदको कोटा आधा घटाएर पठाएपछि बाँकेमा धान खरिद प्रक्रिया अन्योलमा परेको छ । किसानले निर्धारित कोटा बढाउन माग गर्दै आपत्ति जनाएपछि कम्पनीले खरिद सुरु गर्न सकेको छैन ।
कम्पनीले गत वर्ष बाँकेबाट २० हजार क्विन्टल धान खरिद गरेको थियो । तर, यस वर्ष १० हजार क्विन्टल मात्रै खरिद गर्ने कोटा निर्धारण गरेर पठाएको छ । कोटा घटाइएपछि किसानले खरिद सीमा बढाउन माग गर्दै आएका छन् ।
खाद्य व्यवस्था तथा व्यापार कम्पनी लिमिटेड नेपालगन्ज कार्यालयका प्रमुख रामशरण लामिछानेका अनुसार किसानले कोटा बढाउन माग गरेपछि धान खरिद प्रक्रिया सुरु हुन सकेको छैन ।
प्रमुख जिल्ला अधिकारीको अध्यक्षतामा रहेको प्राथमिक खरिद समितिको बैठकले पनि कम कोटामा धान खरिद सुरु गर्दा समस्या हुने निष्कर्ष निकालेको लामिछानेले बताए । त्यसैले अहिलेसम्म खरिद प्रक्रिया अघि बढ्न नसकेको उनले जानकारी दिए ।
सरकारले गत वर्षको तुलनामा यस वर्ष धान खरिदको कोटा आधा घटाएपछि सरकारी मूल्यमा धान बिक्री गर्ने तयारीमा रहेका जिल्लाका अधिकांश किसान निराश बनेका छन् ।
Discussion about this post