बाँके, कात्तिक ५ गते ।
दुर्गा भवानीको मूर्ति विसर्जनलाई सुरक्षित र व्यवस्थित बनाउन बाँकेमा व्यापक सुरक्षा व्यवस्था मिलाइएको छ।
नेपालगन्जका विभिन्न स्थानबाट निकालिएको विसर्जन र्यालीको निगरानी सडकदेखि घरका छत र आकाशसम्मबाट गरिएको थियो। सुरक्षाका लागि एक हजार ४५० भन्दा बढी नेपाल प्रहरी र सशस्त्र प्रहरी परिचालन गरिएको थियो।
घटस्थापनाका दिन नेपालगन्जका विभिन्न स्थानमा स्थापना गरिएका दुर्गा भवानीका मूर्ति बिहीबार दिउँसोदेखि राप्ती नदीस्थित सिधनिया घाटमा विसर्जन गरिएको थियो। दिउँसो सुरु भएको विसर्जन कार्यक्रम बेलुकीसम्म चलेको थियो।
बाँकेका प्रहरी प्रमुख प्रहरी उपरीक्षक (एसपी) अंगुर जिसीले मूर्ति विसर्जनलाई शान्तिपूर्ण रूपमा सम्पन्न गराउन एक हजार १०० भन्दा बढी नेपाल प्रहरी र ३५० भन्दा बढी सशस्त्र प्रहरी परिचालन गरिएको बताए।
सम्भावित अप्रिय घटना रोक्न प्रहरीले संवेदनशील क्षेत्र पहिचान गरी निगरानी बढाएको थियो। सडकमा सुरक्षाकर्मी परिचालन गर्नुका साथै घरका छत र सादा पोसाकमा खटिएका प्रहरीबाट पनि र्यालीको निगरानी गरिएको थियो।
विसर्जन र्यालीको गतिविधि र भीडको अवस्था अनुगमन गर्न वडा प्रहरी कार्यालय नेपालगन्जका प्रमुख प्रहरी निरीक्षक शेखर खड्काले आफैँ ड्रोन उडाएका थिए। ड्रोनबाट र्यालीको अवस्थाबारे जानकारी लिन र सुरक्षा व्यवस्थापन प्रभावकारी बनाउन सहयोग पुगेको प्रहरीले जनाएको छ।
मूर्ति विसर्जनका क्रममा सवारी आवागमन सहज बनाउन ट्राफिक व्यवस्थापनमा समेत ध्यान दिइएको थियो। जिल्ला ट्राफिक प्रहरी कार्यालय बाँकेका प्रमुख प्रहरी निरीक्षक कनकबहादुरको नेतृत्वमा विभिन्न चोकमा ट्राफिक प्रहरी परिचालन गरिएको थियो।
सशस्त्र प्रहरी बल नं. ३० गण हेडक्वार्टर बागेश्वरी बाँकेका गणपति प्रहरी उपरीक्षक भीमबहादुर चन्दको नेतृत्वमा सशस्त्र प्रहरी खटिएको थियो। विसर्जनका क्रममा नेपाल प्रहरी र सशस्त्र प्रहरीबीच समन्वय गरेर सुरक्षा व्यवस्था मिलाइएको थियो।
कार्यक्रमको सुरक्षा अवस्थाबारे जानकारी लिन बाँकेका प्रमुख जिल्ला अधिकारी दिलकुमार तामाङ, एसपी जिसी र एसपी चन्दलगायत सुरक्षा निकायका प्रमुखले अनुगमन गरेका थिए।
घटस्थापनादेखि दसैँ अवधिभर कुनै अप्रिय घटना नभएको एसपी जिसीले बताए। सुरक्षा निकायबीचको समन्वय, संवेदनशील क्षेत्रमा निगरानी र व्यवस्थित परिचालनका कारण मूर्ति विसर्जन कार्यक्रम शान्तिपूर्ण रूपमा सम्पन्न भएको उनले जानकारी दिए।
Discussion about this post