बाँके, कात्तिक १६ गते।
श्रम संस्कृति पार्टीले नेपालगन्जस्थित बागेश्वरी मन्दिरको पूर्वी परिसर सरसफाइ गरेर आफ्नो पहिलो वार्षिकोत्सव मनाएको छ। पार्टीको बाँके जिल्ला समितिको आयोजनामा सोमबार सरसफाइ कार्यक्रम गरिएको हो।
पार्टीका केन्द्रीय सचिव तथा लुम्बिनी प्रदेश इन्चार्ज शान्ति पर्खिनको नेतृत्वमा भएको कार्यक्रममा केन्द्रीय, प्रदेश र जिल्ला तहका नेता तथा कार्यकर्ताहरू सहभागी थिए।
जिल्ला अध्यक्ष श्रीमान थापा मगरको अध्यक्षतामा भएको कार्यक्रममा पर्खिन प्रमुख अतिथि थिइन्। प्रस्तावित केन्द्रीय सदस्यद्वय राजनराना मगर र कस्मिरा खातुन विशेष अतिथि थिए।
त्यसैगरी अगुवा श्रमदाता हाजी चाँद खाँ, मेराज हलवाई, हिमालय, लुम्बिनी प्रदेश समिति सदस्य उषा गौतम र सीता बन्जाडेलगायत सहभागी थिए।
जिल्ला उपाध्यक्षद्वय मोहम्मद रहिस हलवाई र मेघराज सुनार, सचिव दण्डप्रसाद शर्मा, संगठन विभाग प्रमुख गगनसिंह थापा, जिल्ला सदस्यहरू उमा थापा, शान्ति डाँगी, सोयब इदृशी, सम्सुल्ला सल्मानी र राजु राई पनि कार्यक्रममा सहभागी थिए। नगर श्रम संयोजक इम्तियाज राईसहित सकिला खान, कपिल खड्का, साहिन शेष र रुबी बानो रंगरेजलगायत कार्यकर्ताले सरसफाइमा भाग लिएका थिए।
वार्षिकोत्सवका अवसरमा मन्दिर परिसर सरसफाइ गरेर पार्टीले श्रमको सम्मान र धार्मिक तथा सामाजिक सद्भावको सन्देश दिएको जनाएको छ। मन्दिर, मस्जिद, गुम्बा, चर्च र गुरुद्वारालगायत सबै धर्मका आस्थाका केन्द्रको सरसफाइ र संरक्षण साझा जिम्मेवारी भएको पार्टीले जनाएको छ।
कार्यक्रममा बोल्दै केन्द्रीय सचिव पर्खिनले धार्मिक स्थलको सरसफाइले स्वच्छतासँगै सामाजिक सद्भावको सन्देश दिने बताइन्। उनले मन्दिर, मस्जिद, गुम्बा, चर्च र गुरुद्वारा सबै समुदायका आस्थाका केन्द्र भएकाले तिनको संरक्षण र सरसफाइमा सबैले चासो दिनुपर्ने बताइन्।
‘हामीले श्रमको सम्मान र सामाजिक सद्भावलाई व्यवहारमा उतार्नुपर्छ। मन्दिर, मस्जिद, गुम्बा, चर्च र गुरुद्वारा सबै धर्म तथा समुदायका आस्थाका केन्द्र हुन्। यस्ता स्थलको सरसफाइले आपसी एकता र सद्भाव बढाउन सहयोग गर्छ,’ उनले भनिन्।
पार्टीले श्रम, संस्कृति र प्रविधिलाई मुख्य आधार बनाएर समाज परिवर्तनको अभियान अघि बढाउने जनाएको छ। कार्यक्रममा सहभागी नेताहरूले पार्टीको विचार र उद्देश्यलाई जनस्तरसम्म पु¥याउने, संगठन विस्तार गर्ने र सामाजिक सेवाका गतिविधिलाई निरन्तरता दिने बताए।
Discussion about this post