बाँके, कात्तिक १७ गते ।
फोक्सो तथा श्वासप्रश्वाससम्बन्धी रोगको विशेषज्ञ उपचारका लागि लुम्बिनी, कर्णाली र सुदूरपश्चिम प्रदेशका बिरामीले अब नेपालगन्जस्थित भेरी अस्पतालबाटै सेवा पाउने भएका छन् । भेरी अस्पतालले फोक्सो तथा श्वासप्रश्वास रोग, क्रिटिकल केयर र निद्रा रोगसम्बन्धी विशेषज्ञ सेवा सुरु गरेपछि तीन प्रदेशका बिरामीलाई उपचारमा सहज हुने भएको हो ।
यसअघि यस्ता रोगको विशेषज्ञ उपचारका लागि अन्यत्र जानुपर्ने बाध्यता रहेका बिरामीले अब भेरी अस्पतालबाटै सेवा लिन सक्ने अस्पतालका प्रमुख मेडिकल सुपरिन्टेन्डेन्ट डा. नवीन दर्नालले बताए । उनका अनुसार तीन प्रदेशमा प्लमोनोलोजी तथा क्रिटिकल केयर सेवा सुरु गर्ने भेरी अस्पताल पहिलो तथा एकमात्र अस्पताल हो ।
‘तीन प्रदेशका बिरामीलाई लक्षित गरेर विशेषज्ञ सेवा सुरु गरेका छौँ । यसले फोक्सो तथा श्वासप्रश्वाससम्बन्धी समस्या भएका बिरामीलाई उपचारका लागि बाहिर जानुपर्ने बाध्यता कम गर्नेछ,’ उनले भने ।
अस्पतालमा छात्रवृत्ति करारमा कार्यरत प्लमोनोलोजिस्ट डा. रञ्जित पाण्डेले हप्तामा दुई दिन मंगलबार र बिहीबार बहिरंग सेवा दिनेछन् । दम, लामो समयसम्म निको नहुने खोकी, श्वास फेर्न कठिनाइ, फोक्सोको संक्रमण तथा दीर्घकालीन श्वासप्रश्वाससम्बन्धी समस्या भएका बिरामीले विशेषज्ञ सेवा लिन सक्नेछन् ।
फोक्सोसम्बन्धी रोगको पहिचानदेखि आवश्यक परीक्षण र उपचारसम्मको व्यवस्था अस्पतालमै उपलब्ध हुने डा. पाण्डेले बताए । रोगको अवस्था पहिचान गरेर समयमै उपचार तथा थप व्यवस्थापन गर्न विशेषज्ञ सेवाले सहयोग पुग्ने उनको भनाइ छ ।
भेरी अस्पतालमा बाँकेसहित बर्दिया, दाङ, रुकुम, रोल्पा, सल्यान, सुर्खेत, जाजरकोट, दैलेख, कैलाली र कञ्चनपुरलगायत जिल्लाबाट बिरामी उपचारका लागि आउने गरेका छन् । तीन प्रदेशका बिरामीलाई सेवा दिँदै आएको अस्पतालमा नयाँ विशेषज्ञ सेवा थपिनु क्षेत्रीय स्वास्थ्य सेवाका लागि महत्वपूर्ण उपलब्धि भएको अस्पताल विकास समितिका अध्यक्ष डा. लक्ष्मण सिग्देलले बताए ।
‘ठूलो भौगोलिक क्षेत्रका बिरामीलाई सेवा दिँदै आएको अस्पतालमा विशेषज्ञ सेवा थपिँदा बिरामीलाई प्रत्यक्ष लाभ पुग्नेछ,’ उनले भने ।
भेरी अस्पतालले विशेषज्ञ उपचार सेवा विस्तारलाई प्राथमिकता दिएको छ । प्रमुख मेडिकल सुपरिन्टेन्डेन्ट डा. दर्नालका अनुसार अस्पतालले छिट्टै न्युरोसर्जरी र प्लास्टिक सर्जरी सेवा पनि सञ्चालनमा ल्याउने तयारी गरेको छ । सञ्चालनमा रहेका सेवाको गुणस्तर सुधार गर्दै थप विशेषज्ञ सेवा विस्तार गर्ने अस्पतालको योजना रहेको उनले बताए ।
नयाँ सेवाको शुभारम्भ कार्यक्रममा अस्पताल विकास समितिका अध्यक्ष डा. सिग्देल, प्रमुख मेडिकल सुपरिन्टेन्डेन्ट डा. दर्नाल, प्रमुख कन्सल्टेन्ट फिजिसियन डा. राजन पाण्डे, प्रमुख कन्सल्टेन्ट डर्माटोलोजिस्ट डा. बद्री चापागाईं तथा नर्सिङ प्रमुख पद्मादेवी देवकोटालगायतको सहभागिता थियो । सेवाको शुभारम्भ एकजना बिरामीबाट रिबन काटेर गरिएको थियो ।
Discussion about this post