बाँके, कात्तिक २६ गते ।
कृषि विषय पढ्दै गरेका नेपालगन्जका तीन युवाले व्यावसायिक फूलखेतीबाट तिहारमा चार लाख रुपैयाँभन्दा बढी आम्दानी गरेका छन्। नेपालगन्ज उपमहानगरपालिका–१९ फुटाहामा १० कट्ठा जग्गामा लगाएको सयपत्री फूल बिक्री गरेर उनीहरूले उक्त आम्दानी गरेका हुन्।
मध्यपश्चिम विश्वविद्यालयमा कृषि विषयमा स्नातक पढ्दै गरेका नेपालगन्जका वेदराज आचार्य, चेतन केसी र कोहलपुरका असिम सिग्देलले सामूहिक रूपमा गरेको खेतीबाट ११ क्विन्टल फूल उत्पादन गरेका थिए। उनीहरूले प्रतिकिलो ४०० रुपैयाँका दरले सबै फूल बिक्री गरेको व्यवसायी सिग्देलले बताए।
‘हामीले उत्पादन गरेको सबै फूल बिक्री भयो, माग भने अझै रोकिएन,’ उनले भने, ‘पहिले नै बुकिङ गरेका ग्राहकलाई दिन दाङबाट थप दुई क्विन्टल फूल ल्याएर बिक्री गर्नुप¥यो।’
फूल बिक्रीका लागि बुटवल, दाङ, काठमाडौं र सुर्खेतबाट समेत माग आएको अर्का व्यवसायी चेतन केसीले बताए। उनका अनुसार भाइटिकाअघि नै उत्पादन भएको सबै फूल बिक्री भइसकेको थियो।
थोरै लगानी र मेहनतबाट पनि राम्रो आम्दानी गर्न सकिने फूलखेतीबाट प्रमाणित भएको व्यवसायी वेदराज आचार्यले बताए। यसपटकको अनुभवले आगामी वर्ष खेती विस्तार गरी उत्पादन दोब्बर बनाउने योजना बनाएको सिग्देलले बताए।
बाँकेमा यस वर्ष करिब १३ बिघा क्षेत्रफलमा व्यावसायिक फूलखेती गरिएको फ्लोरी कल्चर एसोसिएसन नेपाल बाँकेले जनाएको छ। नरैनापुर, खजुरा, नेपालगन्ज र कोहलपुरमा किसानले सयपत्री, कलकत्ते र आगा ३५५ जातका फूल लगाएका छन्।
एसोसिएसनकी केन्द्रीय सदस्य तथा पुष्प व्यवसायी बिन्दु घर्तीमगरले यस वर्ष स्थानीय उत्पादन बढेसँगै भारतीय फूलको आयातलाई धेरै हदसम्म विस्थापन गर्न सफल भएको बताइन्।
किसानले नेपालगन्जको त्रिभुवनचोक, धम्बोझीचोक र कोहलपुरका विभिन्न स्थानमा बिक्री केन्द्र सञ्चालन गरेर फूल बेचेका थिए। कतिपय उपभोक्ता खेतमै पुगेर फूल खरिद गर्न आएका थिए।
Discussion about this post