बाँके चैत ९ गते । राप्तीसोनारी गाउँपालिकाले विगतका वर्षझै यसवर्ष पनि नदीजन्य पदार्थ ब्यवस्थापन गर्न नदी तथा खोलामा नदीजन्य सामाग्री संकलनको अनुमति खु्ला गरेको छ ।
गाउँपालिकाले आइतबारबाट लागु हुने गरी आगामी जेठ मसान्त सम्मका लागि अनुमति खुला गरेको हो ।
विगतमा गाउँपालिकाले ठेक्का प्रक्रियामार्फत नदी, खोलामा अनुमति दिने गरेपनि यसवर्ष आफैले जिम्मा लिएको छ । गाउँपालिका अन्तर्गत रहेको राप्ती नदी तथा मुगुवा, झिझरी, खैरी र परुवा खोलामा अनुमति दिइएको नदीजन्य पदार्थ ब्यवस्थापन समितिका संयोजक एवम् वडा नम्बर ८ का वडाध्यक्ष खुमबहादुर बस्नेतले जानकारी दिनुभयो ।
नदीजन्य सामाग्री संकलन गर्न भ्याट र वातावरण शुल्क समेत गरी प्रति घनफिट ७ रुपैयाँ ४५ पैसा र प्रति घनमिटर २ सय ६३ रुपैयाँ शुल्क तोकिएको छ ।
गाउँपालिकाले आइ.इ.इ. गरिएको स्थानबाट सुर्यदयदेखी सुर्यास्तसम्म मात्र उत्खनन् र ओसार पसार गर्न पाइने जनाएको छ ।
यस्तै हेवी इक्युपमेन्ट, एक्साभेटर प्रयोग गर्न, नदी तथा खोलाको धार परिवर्तन हुने गरी उत्खनन गर्न तथा पुल, तटबन्ध, मानव बस्तीदेखी ५ सय मिटर क्षेत्रभित्र उत्खनन् गर्न नपाइने संयोजक बस्नेतले बताउनु भयो ।
नियम विपरित र तोकिएको समयभन्दा फरक समयमा उत्खनन् र ओसार–पसार गरेको पाइएमा नियमानुसार कारबाही गरिने गाउँपालिकाले चेतावनी समेत दिएको छ ।
Discussion about this post