बाँके चत १० गते । नेपालगन्ज नाकामा अलपत्र परेका नेपालीलाई उद्दारगरी उनीहरुलाई क्यारेन्टाइनमा राखिएको छ । नेपालगन्जको सिमा जमुनहामा भारतबाट आएर अलपत्र परेका सबै नेपालीलाई उद्दार गरेर नेपालगन्ज महेन्द्र वहुमुखि क्याम्पसमा राखिएको हो ।
बाँकेका प्रमुख जिल्ला अधिकारी कुमारबहादुर खड्काका अनुसार करिव पाँचसय जनालाई बसमार्फत राखेर महेन्द्र बहुमुखी क्याम्पसको भवनमा लगिएको हो । सबैको स्वास्थ्य जाँच गरेर उनीहरुलाई महेन्द्र बहुमुखी क्याम्पसको अस्थाई क्वारेन्टाइनमा लगिएको नेपालगन्ज उपमहानगरपालिकाका जनस्वास्थ्य निरीक्षक जागेश्वर बस्नेतले बताउनुभयो ।
उनीहरुको खानपिन सरकारले व्यहोर्ने भएको छ । प्रदेश सांसद कृष्णा केसी नमुनाका अनुसार क्वारेन्टाइनमा बसेका सबैको खानपिन सरकारले व्यवस्था गर्ने छ ।
बाँके प्रशासनले भने सम्बन्धीत जिल्लाका ब्यक्तिहरुलाई क्याम्पसमा केही समय राखेर सवारीसाधनको ब्यबस्थासहित उनीहरुको गन्तव्यमा पुर्याउने बताएको छ। अब भने कोहिलाई पनि आवतजावत गर्न नदिई पुर्ण रुपमा सिमा बन्द गर्ने बाँकेका प्रमुख जिल्ला अधिकारी खड्काले बताउनुभयो ।
Discussion about this post