काठमाडौं जेठ २४ गते ।
देशभर कोरोना भाइरस संक्रमितको संख्या बढ्दै गएपछि प्रधानमन्त्री केपी ओलीले तत्काल लकडाउन खुकुलो पार्न सम्भव नभएको बताएका छन् ।
बिहीबार बसेको मन्त्रिपरिषद् बैठकमा लकडाउन खुकुलो पार्ने विषयमा भएको छलफलमा ओलीले तत्काल सम्भव नभएको भन्दै असार १ गतेपछि मात्रै मोडालिटी परिवर्तन गरेर जान सकिने बताएपछि ठोस निर्णय हुन सकेन।
प्रधानमन्त्री ओलीले लकडाउनको मोडालिटी परिवर्तनका लागि थप दुई दिन गृहकार्य गरेर अब बस्ने मन्त्रिपरिषद् बैठकमा पेस गर्न कोभिड–१९ रोकथाम तथा नियन्त्रण उच्चस्तरीय समितिका संयोजकसमेत रहेका उपप्रधानमन्त्री तथा रक्षामन्त्री ईश्वर पोखरेललाई निर्देशन दिएका छन् ।
ओलीले कोरोनाको फैलँदो संक्रमण दर कम गर्दै अर्थतन्त्रलाई चलायमान बनाउने गरी लकडाउनको मोडालिटी बनाउनुपर्नेमा जोड दिएको एक मन्त्रीले बताए। लामो समयदेखि लकडाउन जारी रहे पनि कोरोनाको संक्रमण दर झन् बढेपछि सचेतता अपनाउँदै खुकुलो गर्दै जाने विषयमा केही दिनयता प्रधानमन्त्री ओली र उच्चस्तरीय समितिले विभिन्न क्षेत्रका व्यक्तिसँग छलफल गर्दै आएका छन् ।
समितिले लकडाउनको मोडालिटी परिवर्तनसम्बन्धी प्रारम्भिक मस्यौदासमेत तयार पारेको छ। क्राइसिस म्यानेजमेन्ट सेन्टर (सिएमसी)ले १ असारपछि लकडाउनलाई क्रमशः खुकुलो बनाउँदै लैजाने गरी प्रारम्भिक मोडालिटी तयार पारेको छ । संक्रमणको अहिलेको अवस्था हेर्दा ७० दिनपछि मात्रै जनजीवन सहज बनाउन सकिने सिएमसीको प्रक्षेपण छ।
१ असारपछि आंशिक रूपमा हवाई उडान सुरु गर्ने, सुरक्षात्मक उपाय अपनाएर भौतिक दूरी कायम गर्दै दूध, अन्नबाली, तरकारी, फलफूलको बिक्री–वितरण, वस्तुभाउ, सम्पूर्ण कृषिजन्य उत्पादन आंशिक रूपमा खुला गर्ने तयारी छ। त्यसपछि क्रमशः उपभोग्य सामग्री बिक्री–वितरणका केन्द्र, पानी–ग्यास डिपोहरू, स्वास्थ्य संस्था, मिडिया, राहत सहायता केन्द्रहरू, जिमखाना, मर्निङवाकलगायत खुलाउँदै लैजाने प्रस्तावमा उल्लेख छ।
Discussion about this post