बाँके, असोज १ गते ।
कामको प्रलोभन देखाएर भारत लैजान लागिएका दुई १६ वर्षीया किशोरीलाई सशस्त्र प्रहरीले बाँकेको नरैनापुरबाट उद्धार गरेको छ । किशोरीलाई लिन आएका एक भारतीय नागरिकसहित दुईजनालाई पक्राउ गरिएको छ ।
बुधबार साँझ नरैनापुर–१ सुईया क्षेत्रमा नेपालगन्जबाट भारततर्फ जाँदै गरेको रा १ ह ३७३० नम्बरको अटोरिक्सा जाँच गर्दा किशोरीहरू फेला परेका हुन् ।
उद्धार गरिएका किशोरी बर्दियाको बारबर्दिया–२ की सन्जु थारु र ठाकुरबाबा–८ की निर्जला चौधरी हुन् । सशस्त्र प्रहरीका अनुसार प्रारम्भिक अनुसन्धानमा उनीहरूलाई कामको प्रलोभन देखाएर भारत लैजान खोजिएको खुलेको छ ।
किशोरीलाई भारत पु¥याएर बेच्ने उद्देश्य रहेको हुन सक्ने आशंका गरिएको छ । उनीहरूलाई भारतको श्रावस्तीस्थित चौधरी गाउँमा मामाघर जान लागेको बताउन लगाइएको प्रारम्भिक अनुसन्धानबाट खुलेको सशस्त्र प्रहरीले जनाएको छ ।
घटनामा नरैनापुर–३ कालाफाटा बस्ने ३० वर्षीय यार मोहम्मद बेहना र भारत उत्तर प्रदेश, श्रावस्तीका ३३ वर्षीय हनुमान प्रसाद महन्त पक्राउ परेका छन् । उनीहरूको साथबाट अटोरिक्सा, भारतीय मोटरसाइकल र चार थान मोबाइल बरामद भएको छ ।
उद्धार गरिएका किशोरीलाई संरक्षणका लागि पीआरसी नेपाल, सुईयाको जिम्मा लगाइएको छ भने पक्राउ परेका दुवैजनालाई थप अनुसन्धानका लागि नरैनापुर प्रहरीलाई बुझाइएको सशस्त्र प्रहरीले जनाएको छ ।
Discussion about this post