कालीकोट जेठ २८ गते ।
कालीकोटमा भएको टिपर दुर्घटनामा २ जनाको मृत्यु भएको छ भने ३ जना बेपत्ता भएका छन् । टिपरमा जम्मा ३९ जना सवार भएको र दुर्घटनाअघि नै केही यात्रु सडकमा हाम्फालेको प्रहरीले बताएको छ ।
अहिलेसम्म टिपरमा सवार २७ जना यात्रु सम्पर्कमा आएका छन् ।३९ जना सवार रहेको टिपर बुधबार बिहान करिब १०:४० मा लालीघाटस्थित कर्णाली नदीमा खसेको थियो । कर्णाली प्रदेश प्रहरी कार्यालयका प्रवक्ता एसपी राजीवबहादुर बस्नेतका अनुसार दुर्घटनामा ४ जना गम्भीर घाइते भएका छन् ।
उनीहरुको कालीकोट जिल्ला अस्पतालमा उपचार भइरहेको उनले बताए । टिपर चालक २९ वर्षीय रंगनाथ धमलालाई प्रहरीले नियन्त्रणमा लिएको छ । प्रहरीका अनुसार धेरै यात्रु चढाएको भनेर चालकसँग यात्रुको भनाभन भएपछि चालक धमला टिपर छोडेर हिँडेका थिए । घटनास्थलबाट भागेका उनलाई प्रहरील नियन्त्रणमा लिएको हो ।
कोरोना प्रकोपको कारण भारतका विभिन्न ठाउँबाट आएका उनीहरुलाई कालीकोटको रास्कोटस्थित क्वारेन्टाइनमा लगिँदै थियो । टिपरको व्यवस्था पनि रास्कोट नगरपालिकाले गरेको एसपी बस्नेतले बताए । मुख्यमन्त्री महेन्द्रबहादुर शाहीले दुर्घटनामा परेका घाइतेको उद्धार र बेपत्ताको खोजी गरी उपचारको प्रबन्ध मिलाउन सम्बन्धित निकायलाई निर्देशन दिएका छन् ।
उनले अहिले खोजी कार्य भैइरहेको हुँदा मृत्यु हुनेको संख्या यकिन गर्न नसकिएको बताएका छन् ।
Discussion about this post