छाडा पशु संरक्षण कोषको खाता खोलियो, सहयोग गर्न आग्रह

सम्बन्धित समाचार

खोजखबर संवाददाता

बाँके भदौं २ गते । नगरमा छाडा छोडिएका पशु चौपायको ब्यवस्थापन र संरक्षणका लागि नेपालगञ्ज उप–महानगरपालिकाले खडा गरेको कोषको खाता खोलिएको छ । छाडा छोडिएका गाई लगायतका जनावरको संरक्षण र व्यवस्थापनका लागि यसअघि उपमहानगरपालिकाले कोष स्थापना गरेको थियो ।
सो कोषमा रकम जम्मा गर्न सोमवारदेखि बैंक खाता संचालनमा ल्याइएको छ । नेपालगञ्ज उप–महानगरपालिकाका लेखा अधिकृत लोकेन्द्र रावतका अनुसार राष्ट्रिय बाणिज्य बैंक बाँकेमा खाता नम्बर ४१३०००६५९९०१ संचालनमा ल्याइएको हो । गाई संरक्षण अभियानको नाममा उप–महानगरपालिकाले संचालन गरेको खातामा गाई लगायत छाडा छोडिएका पशुको ब्यवस्थापन र संरक्षणका लागि सहयोग रकम जम्मा गर्न सकिने छ ।
नेपालगञ्ज उपमहानगरपालिकाको अग्रसरतामा गाई लगायतका छाडा पशुको संरक्षणका लागि यसअघिनै नेपालगञ्ज उप–महानगरपालिकाका प्रमुख डा। धवलशम्शेर राणाको अध्यक्षतामा ब्यवस्थापन समिति समेत गठन गरिसकिएको छ ।
सो समितिको उपाध्यक्षमा डा। विनोद कर्ण, सचिवमा समिरमान श्रेष्ठ, कोषाध्यक्षमा श्याम शाक्य र सदस्यहरुमा वडा नम्बर २१ का अध्यक्ष रञ्जित खाँ, श्रृष्टि गौतम र दीपक लोध रहनुभएको छ । नेपालगञ्ज उप–महानगरपालिकाका कर्मचारी पवन कनौजिया समितिको सदस्य सचिव तोकिनुभएको छ ।
नेपालगञ्ज उप–महानगरपालिकाका उपप्रमुख उमा थापा मगरको संयोजकत्वमा राजनीतिक दलका प्रतिनिधी सदस्य रहेको अनूगमन समिति पनि गठन गरिएको छ ।
ब्यवस्थापन समितिका अध्यक्ष समेत रहनुभएका नेपालगञ्ज उप–महानगरपालिकाका प्रमुख डा। राणाले छाडा छोडिएका पशु चौपायको ब्यवस्थापन र संरक्षणका लागि सहयोग गर्न सहयोगीहरुलाई बैंक खातामा रकम जम्मा गरिदिन अनुरोध गर्नुभएको छ । खातामा जम्मा भएको रकम छाडा पशुचौपाया संरक्षणका लागि समितिले परिचालन गर्नेछ ।