जनकपुरधाम असार १९ गते ।
शुक्रबार बिहान जनकपुरधाम उपमहानगरपालिका वडा नम्बर–२१ कुर्थास्थित दुधमती नदीको किनारमा ११ वर्षीया बालिका कञ्चन कुमारी पजियारको शव मृत अवस्थामा फेला परेको छ । स्थानीयले बालिकाको बलात्कारपछि हत्या भएको हुनसक्ने आशंका गरेका छन् ।
अहिले घटनास्थलमा प्रहरीले तारबार गरी घटनास्थललाई सिल गरेको छ । खेतमा धानको विउ रोपिरहेका एक किसानलाई दुधमती नदीको किनार तर्फबाट गन्ध लागेपछि उनले त्यहाँ हेर्न जादाँ सो बालिकाको शव देखेपछि प्रहरी र स्थानीवासीलाई जानकारी गराएका थिए ।
बुधबार दिउँसो भैंसी चराउन गएकी बालिकालाई अबेर रातिसम्म गाउँ भर खोजविन गर्दा पनि नभेटिएपछि परिवारजनले बिहीबार विहानै अस्थायी प्रहरी चौकी कुर्थामा उजुरी समेत दिएका थिए । मृतक बालिकाकी काका विजय पजियारले कञ्चन बुधबार दिउँसो भैंसी चराउन चौर तर्फ गएको र अबेर साँझसम्म घर नआउदाँ आफुहरुलाई शंका लागेको बताए ।
उनले भने,‘ बुधबार साँझ एकजना आफन्त कहाँ भोज थियो, हामीले कञ्चन त्यही गएको हुनुपर्ने आशंका गर्यौँ र चौरमा गएर उनकी बुवा उमेश पजियारले भैसी ल्याए, अबेर रातिसम्म पनि सबै ठाउँमा खोजविन गर्यौँ । तर कतैपनि नभेटिएपछि बिहिबार विहान स्थानीय अस्थायी प्रहरी चौकीमा उजुरी गर्यौँ र खोजविन पनि जारी राख्यौँ ।
एकाएक आज एक किसानले घरमा आएर नदीको किनारमा फालिएको अवस्थामा छोरीलाई हेरेको बताएपछि आफुहरु छोरीलाई खोजविन गर्ने क्रममा पानी परिरहेको र सो क्रममा अघोरी बाबाको कुटीमा पानीबाट बच्नका लागि भित्र पस्न खोज्दा उनले हामीलाई कुटी भित्र छिर्न नदिएको मृतककी पिता उमेशले बताए ।
छोरीको शव हेर्दा हत्या गरेर बलात्कार गरिएको उनले आशंका व्यक्त गरे । स्थानीय दिनेश साहले बालिकाले जिउमा गंजी मात्रै लगाएको र शरिर भरी रगताम्य रहेको शव नदी किनारमा देखिएकाले बलात्कार गरी हत्या गरेको आशंका व्यक्त गरे । उनले भने,‘लकडाउन अवधि देखि गाउँ वरिपरी रहेका चौर र आँप बगैचामा गाउँ बाहिरबाट युवाहरु आएर त्यहाँ बसिरहेका थिए ।
उनीहरु जस्ता मादक तथा लागुपदार्थ सेवन गर्नेहरुले नै यस्तो गलत कार्य गरेको हुनुपर्दछ । यता जिल्ला प्रहरी कार्यालय धनुषाका प्रहरी नायब उपरिक्षक रामेश्वर कार्कीले प्रारम्भिक अनुसन्धानका लागि एक अघोरी बाबालाई समातिएको र घटनाबारे थप अनुसन्धान जारी रहेको जानकारी दिए ।
Discussion about this post