सरला सुबेदी
बाँके साउन २७ गते ।
कोरोना कहरकै बिचमा यसपालीका चाडपर्वहरु सुरुवात भएका छन् । आज श्रीकृष्ण जन्माष्टमि अर्थात कृष्ण भगवानको जन्मोत्सव । कृष्ण जन्माष्टमीलाई सातम आठम, गोकुलष्टमी, अष्टमी रोहिनी, श्रीकृष्ण जयन्ती, श्री जयन्ती वा कहिलेकाही साधारण भाषामा जन्माष्टमी भन्ने गरिन्छ ।
भगवान विष्णुको आठौं अवतारको रूपमा श्री कृष्णको जन्मदिनको अवसरमा हिन्दुहरूले मनाइने वार्षिक पर्व हो। कृष्णा जन्माष्टमीमा हिन्दूहरूले भगवान श्रीकृष्णको पूजा आराधना गरी श्रद्धा-भक्तिपूर्वक मनाउँछन् । ज्ञानयोग, कर्मयोग र भक्तियोगका प्रणेता भगवान श्रीकृष्णको जन्म द्वापरयुगमा हिन्दु पन्चाङ्ग अनुसार भाद्रकृष्ण अष्टमिको मध्यरातमा भएकाले उक्त दिनलाई श्रीकृष्ण जन्माष्टमी र रातलाई मोहरात्री भनिन्छ।
जन्माष्टमीका दिन अधिराज्यका कृष्ण मन्दिरहरूमा भगवान् श्रीकृष्णको पूजा-आराधना, प्रवचन, भजन-कीर्तन गर्नुका साथै विशेषगरी महिलाहरू व्रत बसी रातभर जाग्राम बस्ने चलन छ।
अन्याय, अत्याचार र राक्षसी प्रवृत्तिबाट मानवमात्रको संरक्षण गर्न भगवान् विष्णुको आठौं अवतारको रूपमा जन्मेका श्रीकृष्णले आजीवन सत्यको पक्षमा रही सत्कर्मका लागि मानव समुदायलाई प्रेरित गरेका थिए। कुरुक्षेत्रमा कौरवहरूसँगको लडाइँमा संलग्न पाण्डवहरूमध्येका अर्जुनलाई उपदेश दिने क्रममा स्वयं उनका मुखारविन्दबाट व्यक्त श्रीमद्भागवत गीता
हिन्दूहरूको पवित्र ग्रन्थ मानिन्छ।
बाल्यकालदेखि नै आफ्ना विचित्र लीला देखाएका श्रीकृष्णले पुतना, कंस, जरासन्ध, शिशुपालजस्ता दानवी प्रवृत्तिको संहार गरेका थिए। जन्माष्टमीमा पाटनको मंगलबजारस्थित प्रसिद्ध कृष्ण मन्दिरमा ठूलो मेला लाग्दथ्यो तर यसपाली भने कोभिड १९ कोरोना भाइरसको कारण मन्दिर नखुल्ने भएको छ।
अघिल्ला बर्षहरुमा जन्माष्टमिको उपलक्ष्यमा नेपाल विभिन्न ठाउँका विभिन्न धार्मिक संघ/संस्थाहरूद्वारा श्रीकृष्णको झाँकीसहित शोभायात्रा निकालिने गरिन्थ्यो। भारतमा समेत विभिन्न समुदायका हिन्दू धर्मावलम्बीहरू कृष्णाष्टमी हर्षोल्लासका साथ मनाउने गर्छन्।
तर यसबर्ष भने कोरोनाको डरले गर्दा नेपालमा मात्र नभई भारतमा पनि श्रीकृष्ण जन्माष्टमिको कुनै रोनक देखिएको छैन । तर हामी सबैको आस्थाको कुरा हो तामझामको साथ श्रीकृष्ण जन्माष्टमी मनाउन नसकेता पनि आ आफ्नो घरमै बसि सबैले परिवारको साथमा हर्षोउल्लासका साथ यो पर्व मनाउनु होला।
Discussion about this post