खोजखबर संवाददाता
बाँके भदौ १५ गते । सहरी विकास मन्त्री मोहम्मद ईश्तियाक राईले शिकिस्त विरामी रहेका बाँके र सुर्खेतका २ जना पत्रकारलाई जनही ५०–५० हजार गरेर एक लाख रुपैयाँ नगद सहयोग प्रदान गरेका छन् । आइतवार नेपालगन्जमा आयोजना गरिएको एक कार्यक्रममा मन्त्री राईले क्यान्सरबाट पिडित बाँकेका पत्रकार रेशम विरही र बोन मैरोको समस्याले पिडित सुर्खेतका पत्रकार डिल प्रकाश शर्मालाई जनही ५०–५० हजार नगद सहयोग प्रदान गरेका हुन् ।
कार्यक्रममा मन्त्री राईले पत्रकार विरहीलाई प्रदान गरेको नगद ५० हजार रुपैयाँ नेपाल पत्रकार महासंघ बाँकेका अध्यक्ष ठाकुर सिंह थारुलाई हस्तान्तरण गरे भने सुर्खेतका पत्रकार शर्माललाई प्रदान गरेको नगद ५० हजार रुपैयाँ नेपाल पत्रकार महासंघका निवर्तमान अध्यक्ष रुद्र सुवेदीलाई हस्तान्तरण गरेका थिए ।
सो अवसरमा मन्त्री राईले पत्रकार महासंघ र वरिष्ठ पत्रकारहरुको आग्रहमा आफुले व्यक्तिगत रुपमा सो सहयोग गरेको जनाउँदै सरकारबाट हुने सहयोग पनि उपलब्ध गराउन पहल गर्ने बताए । नेपाल पत्रकार महासंघका सदस्य समेत रहेका विरहीको उपचारमा आर्थिक समस्या उत्पन्न भएपछि नेपाल पत्रकार महासंघ बाँकेले यस अघिनै रकम संकलन अभियान शुरुर गरेको थियो । सो का लागि नेपालगन्ज उपमहानगरका मेयर डा. धवल शमसेर राणाले पनि ५० हजार रुपैयाँ प्रदान गरेका थिए ।
Discussion about this post