पोखरा भदौ ५ गते ।
गण्डकी प्रदेशसभा सदस्य प्रकाशचन्द्र दवाडीले कृषकका लागि निकासको बाटो खोजेर यथाशीघ्र मल उपलब्ध गराउन सरकारसँग माग गरेका छन्। बिहीबार एक प्रेस विज्ञप्ती जारी गर्दै नेता दवाडीले चाँडोभन्दा चाँडो मल आयात गरी सहुलियत दरमा किसानलाई उपलब्ध गराउन आग्रह गरेका हुन्।
किसानले लगाएको धानबालीले समयमै मल नपाउँदा बिग्रने अवस्थामा पुगिसकेको भन्दै नेता दवाडीले भने, ‘सरकारले मल आयातमा ढिलाई गर्नुमा कतै अनियमितता जोडिएको त छैन ?’ किसानले धानमा मल हाल्न नपाउनु ज्यादै दुःखद भएको उनले बताए। ‘कोभिड–१९ को महामारीसँगै जुधिरहेका किसानले समयमै मल नपाउँदा अर्काे मार खेप्न बाध्य भएका छन्, ‘ उनले भने, ‘रोपाईँ सकिएको करिब एक महिना बितिसक्दासम्म पनि किसानले मल नपाउनु भनेको कृषि र कृषकप्रति सरकार उदासिन हुनु हो।’
सरकारको यस प्रकारको क्रियाकलापले कृषकलाई निरुत्साहित गर्ने लागेको प्रष्ट भएको उनको भनाइ छ। ‘आज सरकारले सोझा जनतालाई विगतका वर्षजस्तै आश्वासन देखाएर जनतामाथि भ्रमको खेती गरिरहेको त छैन? मलाई चिन्ता लागेको छ,’ उनले भने, ‘गरिब किसानले दुःख कष्टका साथ लगाएको धानवाली पहेँलिने अवस्थामा पुगिसकेकोले समयमै मल नहाल्दा बाली बिग्रने, धान उत्पादनमा ह्रास आउने समस्या प्रवल बन्दै गएको छ, जसकारण भविष्यमा भोकमरी हुने अवस्था नआउला भन्न सकिन्न।’ कोरोना महामारीसँगै मलको अभाव हुँदा कृषकको बाली नष्ट हुने, श्रम खेर जाने, खाद्यान्नको अभाव हुने जोखिम पनि बढ्दै गएको उनले बताए।
Discussion about this post