बाँके असोज २० गते ।
कोहलपुर नगरपालिकाले व्यवसायका नाममा नगर क्षेत्रका मुख्य सडक अतिक्रमण गरि व्यवसाय सञ्चालन गरिदाँ नगर क्षेत्र अस्तव्यस्त भएको भन्दै फेरी व्यवसाय नगर्न चेतावनी दिएको छ । नगर क्षेत्रमा पर्ने महेन्द्र राजमार्ग, रत्न राजमार्ग र चौराहा लगायतका क्षेत्रमा सार्वजनिक सडक अतिक्रमण गरि व्यवसाय नगर्न नगरपालिकाले चेतावनी दिएको हो ।
तीन प्रदेशको ट्रान्जिट प्वाइन्टको रुपमा रहेको कोहलपुरको चौराहा र राजमार्ग क्षेत्रमा विभिन्न व्यक्तिहरुले व्यवसाय सञ्चालन गर्दै आएका छन् । दैनिक सडक क्षेत्रमा व्यवसाय गरेर जिविकोपार्जन गर्दै आएका ठेलागाडा, फूटपात पसल, घुम्ती लगायतलाई अव्यवस्थित रुपमा व्यवसाय नगर्न नगरपालिकाले चेतावनी दिएको छ । नगरपालिकाद्धारा जारी एक सूचनामा अन्य व्यवसायका साथै सवारी साधन, ई–रिक्साहरु अव्यवस्थित रुपमा पार्किङ गरिएको हुँदा पटक–पटक सूचना जारी गर्दा समेत अटेरी गरिएको बताइएको छ ।
उक्त स्थानमा व्यवसाय नगर्नु नगराउनु भन्ने आदेशको समेत अवज्ञा भइरहेको उल्लेख गरिएको छ । प्रमुख प्रशासकीय अधिृकतको नाम नै उल्लेख नगरि जारी गरिएको सूचनामा फेरी उक्त क्षेत्रमा व्यवसाय गरिरहेकाहरुलाई सचेत रहन सूचना जारी गरिएको हो । ‘सचेत रहन यो सूचना जारी गरिएको छ । आदेश अवज्ञा गरेको पाइएमा फूटपातमा भएका सामग्री समेत जफत गरिनेछ ।’
उक्त सूचनामा भनिएको छ । आदेश अवज्ञा गरिएको खण्डमा स्थानीय प्रशासन, प्रहरी र नगरपालिकाको अनुगमन टोली सूचना विपरित फूलपातमा राखिएका मालसमानहरु लिलाम समेत गरिने चेतावनी दिइएको हो । कोरोना कहरका कारण बन्द अवस्थामा रहेका व्यवसाय विस्तारै खुल्दैछन् । यता कोहलपुर नगरपालिकाका प्रमुख लुट बहादुर रावतले बजार क्षेत्र अव्यवस्थित भएकोले व्यवस्थित रुपमा व्यवसाय सञ्चालन गर्न जानकारी गराइएको जानकारी दिए ।
Discussion about this post