जावेद अन्सारी
बाँके कार्तिक ३ गते ।
सोमवार विहान लुम्विनी, कर्णाली र सुदूरपश्चिम प्रदेशको प्रमुख व्यापारिक केन्द्र नेपालगन्जको बसपार्क पुग्दा सवारी चालक तथा कर्मचारी र बस व्यवसायी समितिका कर्मचारी यात्रुको प्रतिक्षामा बसिरहेका थिए। बडादशैँको दोस्रो दिन हुँदा समेत गन्तव्य जान आउने यात्रु तथा टिकट काट्न पुग्नेहरुको संख्या औलामा गन्न सकिने अवस्था थियो। विगतका वर्षमा भीडभाड र गन्तव्य जानेहरुको चहलपहलले दशैँका बेला भरिभराउ बसपार्क सुनसान हुँदा लाग्थ्यो की यसवर्ष दशैँ नै आएको छैन्।यस वर्षभने बसपार्कमा यात्रुको चाप नै नभएपछि व्यवसायी चिन्तित बनेका छन्।
विश्वव्यापी महामारीका रुपमा फैलिएको कोरोनाको त्रासले यात्रुहरु नपाउँदा समस्या भएको बस चालक मनोज केसीले बताए। ‘यात्रु पाउनै मुस्कील भइरहेको छ’, उनले भने, ‘खाली गाडी ओहरदोहर गर्नुपर्ने बाध्यता छ।’ झण्डै ६ महिनादेखि जारी लकडाउन र निषेधाज्ञा खुलेपछि लयमा फर्किने आशामा रहेका व्ययवसायीहरुले दशैँका बेला घाटालाई सन्तुलन गर्ने विश्वास गरेका थिए। उनले नेपालगन्ज रुकुम बस चलाउछन् ।
तर संक्रमणको जोखिमले मानिसहरुको आवतजावत नभएपछि उनीहरु निराश बनेका छन्। घाटा पुर्ति हुने कुरा कता हो कता दर्शैँमा यात्रु नपाउँदा पेट्रोल खर्च समेत नउठ्दा समस्या भएको धनगढीका बस व्यवसायी जित बिसीले बताए। ‘विगतका वर्षहरुमा यात्रु बढी भएर गाडी नै पुग्दैन थियो,’ उनले भने, ‘यस वर्ष भने कोरोको प्रभावका कारण आम नागरिकले सार्वजनिक सवारी गर्न नै छोडिदिए।’
विगतमा काम विषेशले घर बाहिर रहेकाहरु, विद्यालय, कलेज अध्ययन गर्ने विद्यार्थीहरु दशैंको समयमा विभिन्न शहरबाट जन्मथलो फर्किने गर्दथे। तर यस वर्ष भने कोरोना प्रभाव पछि जारी लडाउनकै अवधीमा अधिकांश घर बाहिर बस्नेहरु फर्किसकेका कारण पनि सवारी साधनले यात्रु नपाएको आकलन गरिएको छ।
भारतबाट फर्किनेहरु पनि लडाउनकै अवधीमा आइसकेका कारण दशैंमा पनि बाँकेको यातायात क्षेत्र सुनसान भएको हो। स्वास्थ्य सुरक्षाका मापदण्डहरु पालन गरी सवारी साधन संञ्चालन गर्न अनुमती दिइएको भएपनि यात्रु नपाउदा यातायात व्यवसायीले घाटा व्यहोर्नुपर्ने निश्चित छ।
Discussion about this post