एजेन्सी
काठमाडौं कार्तिक ९ गते ।
अफगानिस्तानको राजधानी काबुलमा रहेको एक शिक्षा केन्द्रबाहिर भएको आत्मघाती आक्रमणमा कम्तीमा १८ जनाको ज्यान गएको छ । यो आक्रमण एक निजी संस्थाको बाहिर भएको हो, जसले उच्च शिक्षाको कैयौँ कोर्स गराउँदै आएको थियो । सिया मुसलमान धेरै भएका क्षेत्र दश्त–ए–बार्चीको यस भवनमा सैयौँको सङ्ख्यामा मानिसहरु हुने गर्दछन् ।
आक्रमणका घाइते भएका कैयौँलाई अस्पताल लगिदैछ भने ज्यान गुमाउनेको सङ्ख्या बढ्न सक्ने अधिकारीहरुले बताएका छन् । इस्लामिक स्टेट समूहले सामाजिक सञ्जालमा एक पोस्टमा आक्रमणको जिम्मा लिएको सन्देश दिए पनि कुनै प्रमाण पेस गरेको छैन । यसअघि तालिबानले आफू घटनामा सामेल नभएको बताएको थियो ।
आक्रमणपछि गृह मन्त्रालयका प्रवक्ता तारिक एरिएनले एक विज्ञप्ति निकाल्दै भन्नुभएको छ, ’एक आत्मघाती आक्रमणकारीले शिक्षा केन्द्रको भवनभित्र पस्ने कोसिस गरे । सुरक्षाकर्मीहरुले उनको पहिचान गरेपछि उनले ढोकामा नै विस्फोट गराए ।’ एक स्थानीय नागरिक अली रेजाले समाचार एजेन्सी एएफपीलाई ज्यान गुमाउनेमा धेरै विद्यार्थी भएको जानकारी दिनुभयो ।
आक्रमणको समयमा अधिकांश विद्यार्थी भवनभित्र पस्नका लागि ढोकाबाहिर उभिएका थिए । उहाँले भन्नुभयो, ’शक्तिशाली विस्फोट हुँदा म त्यहाँबाट झण्डै एक सय मिटरको दुरीमा थिएँ ।’ पछिल्ला केही हप्तायता अफगानिस्तानमा हिंसा बढिरहेको छ । धेरैजसो आक्रमण तालिबानले गर्दै आएका छन् ।
Discussion about this post