काठमाडौं कार्तिक २१ गते ।
प्रधानमन्त्री केपी शर्मा ओलीले गोकर्ण विष्टलाई मन्त्री बन्न प्रस्ताव गरेका छन् । ११ महिना अघि मन्त्रीबाट बिष्टलाई हटाएका प्रधानमन्त्री ओलीले पुनः मन्त्री बन्न प्रस्ताव गरेका हुन् ।
अघिल्लो वर्षको मंसिर ४ गते मन्त्रिपरिषद् पुनर्गठन गर्दै श्रम, रोजगार, तथा सामाजिक सुरक्षा मन्त्रीबाट बिष्ट हटाएर रामेश्वर राय यादवलाई मन्त्री बनाएका प्रधानमन्त्री ओलीले अहिले मन्त्रीबाट हटाएकोमा पश्चताप गर्दै मन्त्री बन्न प्रस्ताव गरेको स्रोतको दाबी छ ।
राम्रो काम गर्ने मन्त्रीको सूचीमा परेका उनलाई हटाइएपछि प्रधानमन्त्री ओलीको आलोचना भएको थियो । कार्य सम्पादन मुल्यांकनमा राम्रो अंक ल्याएका बिष्ट, लालबाबु पण्डितसहितलाई हटाएपछि सत्तारुढ नेकपा अध्यक्ष ओली र पुष्पकमल दाहाल प्रचण्डको आलोचना भएको थियो ।
बिष्टको बिदाइलाई कतिपयले वैदेशिक रोजगार व्यवसायीहरुको दबाबलाई आधारको रुपमा लिएका थिए । वैदेशिक रोजगारलाई व्यवस्थित बनाउन ठूलो भूमिका निर्वाह गरेका उनलाई हटाउन म्यानपावर व्यवसायीहरुले प्रधानमन्त्री ओलीलाई दबाब दिँदै आएको चर्चा पनि चल्ने गरेको थियो ।
तर, उनै बिष्टले राम्रो काम गरेको अहिले आफूले बुझेको भन्दै प्रधानमन्त्री ओलीले उनलाई सरकारमा आउन प्रस्ताव गरेको स्रोतको दाबी छ ।
हालै गएको बडादशैँका बेला बालुवाटारमा बोलाएर बिष्टलाई प्रधानमन्त्री ओलीले मन्त्री बन्न प्रस्ताव गरेका हुन् । तर, प्रधानमन्त्री ओलीको प्रस्तावलाई बिष्टले अस्वीकार गरेका छन् । आफ्नो पार्टीका अध्यक्ष ओलीलाई असर पुर्याएर आफू मन्त्री बन्न नसक्ने जवाफ दिएका छन् ।
अघिल्लो वर्ष राम्रो काम गर्न नसकेको वा आवश्यकता नठानेर हटाइएको आफूलाई पुनः मन्त्री बनाउँदा पार्टी अध्यक्षसमेत रहेका प्रधानमन्त्री ओलीको कडा आलोचना हुने भएकाले उनले मन्त्री बन्न अस्वीकार गरेको स्रोतको दाबी छ ।
पार्टी अध्यक्ष ओलीलाई नकारात्मक असर पु¥याएर मन्त्री बन्नु उचित नहुने बिष्टको तर्क रहेको थियो । नेकपा विवादको संघारमा पुगेका बेला बिष्टलाई मन्त्री बन्न प्रधानमन्त्री ओलीले प्रस्ताव गरेका हुन् । पूर्व एमाले पक्षधरलाई एकजुट बनाउने उद्देश्यले प्रधानमन्त्री ओलीले उनलाई मन्त्री बनाउन प्रस्ताव गरेका हुन् ।
सोमबार बिष्टले नेता र पार्टी भन्दा ठूलो देश र जनता मान्नुपर्ने बताएका छन् । देश र जनतालाई केन्द्रभागमा राखेर अघि बढ्नु पर्ने भन्दै उनले सामाजिक सञ्जाल फेसबुकमा लेखेका छन्, ‘देश र जनता भन्दा नेता ठूलो, पार्टी भन्दा गुट ठूलो ठान्ने प्रवृत्तिलाई सच्याएर मात्रै आन्दोलनलाई थप सशक्त र एकताबद्ध बनाउन सकिनेछ ।’
आफूले पाउने पदभन्दा ठूलो पार्टी र अध्यक्षको गरिमा कायम राख्नुपर्ने विचार बोकेका बिष्टले मन्त्री बन्न अस्वीकार गरेको नेकपा स्रोतको दाबी छ । प्रधानमन्त्री ओलीले बिष्टसहित पूर्व एमालेका नेताहरुलाई एकताबद्ध बनाउने कसर सुरु गरेका छन् ।
शनिबार प्रदीप नेपालको निवास गोठाटारमा प्रधानमन्त्री ओलीनिकट नेताहरु स्वास्थ्यमन्त्री भानुभक्त ढकाल, लुम्बिनी प्रदेशका मुख्यमन्त्री शंकर पोखरेल, प्रधानमन्त्रीका प्रमुख सल्लाहकार विष्णु रिमाल, प्रधानमन्त्रीका परराष्ट्र सल्लाहकार डा. राजन भट्टराई र प्रधानमन्त्रीका प्रेस सल्लाहकार सूर्य थापा पुगेका थिए । प्रधानमन्त्री ओलीको सन्देशसहित उनीहरु त्यहाँ पुगेको स्रोतले जनाएको छ ।
Discussion about this post