बाँके कार्तिक २३ गते ।
कोरोना भाइरस संक्रमणबाट भेरी अस्पतालमा थप एकजनाको मृत्यु भएको छ । रोल्पा लिवाङ नगरपालिका ४ का ५६ बर्षीय पुरुषको उपचारका क्रममा गएराती मृत्यु भएको जिल्ला कोभिड १९ संकट व्यवस्थापन केन्द्र बाँकेका कोरोना फोकलपर्सन नरेश श्रेष्ठले जानकारी दिनुभयो ।
स्वास्थ्यमा समस्या आएपछि सुरुमा उनले रोल्पाको रेउघा स्वास्थ्य संस्थामा चेकजाँच गराएका थिए । त्यहाँबाट १४ गते नेपालगन्ज मेडिकल कलेज कोहलपुरमा पठाइएको थियो । कोभिडको आंशकमा उनको त्यसैदिन स्वाब संकलन गरिएको थियो ।
त्यसको भोलिपल्ट कोरोना पोजेटिभ रिपोर्ट आएको अस्पतालले जनाएको छ । १६ गते ती पुरुषलाई भेरी अस्पतालको कोभिड युनिटमा भर्ना गरिएको थियो । उनलाई रोगको प्रकृति अनुसार, सबै प्रकारको उपचार गरिएको थियो ।
तर अवस्था सुधार नभएपछि गएराती १२ः१० बजे मृत्यु भएको अस्पतालले जनाएको छ । उनलाई कडा खाले कोभिड देखिएको उपचारमा संलग्न चिकित्सकहरुको भनाइ छ । योसँगै बाँकेमा उपचारका लागि आएका २९ जनाको मृत्यु भएको छ ।
Discussion about this post