बाँके चैत २० गते।
बाँके जिल्लामा माध्यमिक शिक्षा परीक्षा (एसइई) २०८२ को उत्तरपुस्तिका जाँच कार्य सुरु गरिएको छ। चैत १९ गते बिहीबारदेखि जाँच कार्य सुरु गरिएको शिक्षा विकास तथा समन्वय एकाई बाँकेका प्रमुख धनसुदन चौलागाईँले जानकारी दिएका छन्।
परीक्षा नियन्त्रण कार्यालयको व्यवस्थाअनुसार नतिजा छिटो, व्यवस्थित र समयमै सार्वजनिक गर्ने उद्देश्यले जिल्लाभरका सबै परीक्षा केन्द्रमा उत्तरपुस्तिका जाँच कार्य सञ्चालन गरिएको जनाइएको छ। प्रमुख चौलागाईँका अनुसार जाँच प्रक्रियालाई निष्पक्ष, पारदर्शी र व्यवस्थित बनाउन आवश्यक सुरक्षा व्यवस्था समेत मिलाइएको छ।
यस वर्ष बाँकेबाट कुल ९ हजार ६१५ विद्यार्थी एसइईमा सहभागी भएका छन्। तीमध्ये ७ हजार ९१३ नियमित र १ हजार ७०२ ग्रेड वृद्धि तर्फका विद्यार्थी रहेका छन्। साथै ४१ जना कैदीबन्दी तथा बालबिज्याइँकर्ता पनि परीक्षामा सहभागी भएका छन्।
जिल्लास्थित दुई बालसुधार गृहका ३४ जना बालबिज्याइँकर्ता र दुई कारागारका ७ जना कैदीबन्दीले परीक्षा दिएका हुन्। डुडुवा गाउँपालिका–६ आसमानपुरस्थित जयेन्दु बालसुधार गृहका ३१, बैजनाथ गाउँपालिका–३ नौवस्तास्थित बालसुधार गृहका ३, नेपालगन्ज कारागारका ४ तथा नौवस्ता कारागारका ३ कैदीबन्दी सहभागी भएका छन्।
जिल्लाका ८ वटा पालिकामा रहेका २७ सामुदायिक र ९ संस्थागत गरी कुल ३६ परीक्षा केन्द्रबाट परीक्षा सञ्चालन गरिएको थियो। तीमध्ये नेपालगन्ज उपमहानगरपालिकामा ११, कोहलपुर नगरपालिकामा १०, राप्तीसोनारी, बैजनाथ र खजुरा गाउँपालिकामा चार–चार तथा नरैनापुर, डुडुवा र जानकी गाउँपालिकामा एक–एक परीक्षा केन्द्र रहेका छन्।
शिक्षा विकास तथा समन्वय एकाईका अनुसार जिल्लामा दुई मदरसासहित १०५ सामुदायिक र १०६ संस्थागत गरी कुल २११ विद्यालयका विद्यार्थी सहभागी भएका छन्। तीमध्ये ४ हजार ६७५ छात्रा र ४ हजार ९४० छात्र रहेका छन्।
त्यसैगरी, १० सामुदायिक विद्यालयका २७० नियमित र ५४ ग्रेड वृद्धि गरी ३२४ जना प्राविधिक धारका विद्यार्थी पनि परीक्षामा सहभागी भएका छन्। सामुदायिक विद्यालयतर्फ ६ हजार ३८५ र संस्थागत विद्यालयतर्फ ३ हजार २३० विद्यार्थी सहभागी भएको जनाइएको छ।
कुल ३६ परीक्षा केन्द्रमध्ये नेपालगन्जस्थित महेन्द्र माध्यमिक विद्यालय केन्द्रबाट सबैभन्दा धेरै ३७५ विद्यार्थी र राप्तीसोनारी गाउँपालिका शमसेरगन्जस्थित शिवशक्ति माध्यमिक विद्यालय केन्द्रबाट सबैभन्दा कम १६२ विद्यार्थी परीक्षामा सहभागी भएका छन्।
Discussion about this post