बाँके मंसिर ७ गते ।
जमुनाह नाकामा खटिएको सशस्त्र प्रहरीले सेटिङमा अवैध सामान भित्र्याउने र पठाउने गरेको खुलेको छ । नाकाको पश्चिमतिरको क्षेत्रबाट भारतबाट क्यारिङवालासँग मिलेर सशस्त्र प्रहरीको सहयोगमा दैनिकरुपमा ठूलो परिमाणमा भन्सार छलेर अवैध सामान भित्र्याउने गरेको तथ्य फेला परेको हो ।
सशस्त्र प्रहरीलाई दुईदेखि तीन सय रुपैयाँ दिएर क्यारिङवालाले ठूलो परिमाणमा अवैध सामान भित्र्याउने गरेका छन् । विओपी पोष्टबाट डिउटीमा खटिने सशस्त्रका जवानदेखि असइसम्म अवैध असुल धन्धामा लागेका छन् । क्यारिङवालाले चिनी, प्याजलगायतका अवैध सामाग्री भित्र्याउने गरेका छन् । उनीहरुले नेपालबाट भारततर्फ पनि सामान लैजाने गरेका छन् । जाउआउका लागि उनीहरुले दुई तीन सयरुपैयाँ डिउटीमा रहेका सशस्त्रलाई बुझाउने गरेको अन्लाईन खोजखवरलाई बताएका छन् ।
खोजखबरसँगको भिडियो अन्तवार्तामा उनीहरुले सशस्त्रलाई रकम बुझाएको स्पष्टसँग भनेका छन् । नाकामा हुने अवैध धन्दा रोक्न खटिएको सुरक्षाकर्मी स्वयम अवैध असुली धन्धामा लागेको प्रमाण खोजखवरले फेला पारेको छ । यसअघि पनि नेपालगन्जको जमुनाह नाकामा खटिने सशस्त्र प्रहरीले भारतीय नागरिकसँग रकम असुल्दै भित्र्याउने गरेको तथ्य फेला परेको थियो ।
रकम असुल्दै चोरबाटोबाट भारतीयहरुलाई भित्र्याउने क्रममा असुल गरिएको रकम सशस्त्र प्रहरीले फिर्ता समेत गरेको थियो । रोजगारीको शिलशिलामा चारजना भारतीय नेपाल प्रवेश गर्न खोजीरहेका थिए । उनीहरुबाट सशस्त्रले १ हजार ३ सय ५० रुपैयाँ असुलेका थिए ।
जमुनाह नाकाको पश्चिमतर्फबाट उनीहरु प्रवेश गरेका थिए । त्यहाँ सशस्त्र प्रहरीको डिउटी हुने गर्छ । ती भारतीय कसरी भित्रिए भनेर सोधीखोजी गर्दै जाँदा सशस्त्रलाई घुस दिएर प्रवेश गरेको खुलेको थियो । मिडियासम्म खवर पुगेपछि ती नागरिकबाट असुल गरिएको रकम सशस्त्र प्रहरीले फिर्ता गरेको थियो । कोरोना भाइरसका कारण सीमानाका सील गरिएपछि दुवै देशका नागरिकहरु सहज तरिकाले आउजाउ गर्न पाएका छैनन् ।
यही मौकामा नाकामा खटिएका सशस्त्र प्रहरीले भने रकम असुल्दै नागरिकहरु वारपार गराउनेदेखि अवैधरुपमा भित्रिने सामानको रकम असुल्ने नयाँ धन्दा सुरु गरेको छ । यहाँसम्म की नेपालबाट भारतसम्मै सशस्त्रको सेटिङमा सवारीसाधन पुग्ने गरेको नाका वरपरका बासिन्दाहरु बताउँछन् ।
Discussion about this post