बाँके, असार २४ गते ।
पर्याप्त वर्षा नहुँदा बाँकेमा हालसम्म ३५ प्रतिशत मात्र धान रोपाइँ सम्पन्न भएको छ। कृषि ज्ञान केन्द्र बाँकेका अनुसार सिँचाइ सुविधा भएका केही क्षेत्रबाहेक अधिकांश किसान अझै पनि वर्षाको भरमा रोपाइँ गर्न बाध्य छन्।
कृषि ज्ञान केन्द्र बाँकेकी सूचना अधिकारी तथा वरिष्ठ कृषि प्रसार अधिकृत सुजिता शर्माले असार १५ गते राष्ट्रिय धान दिवस मनाइँदा जिल्लामा केवल ०.५ प्रतिशत मात्रै रोपाइँ भएको बताइन्। पछिल्ला दिनमा भएको सामान्य वर्षा र सिक्टा सिँचाइ आयोजनाको नहरमार्फत उपलब्ध पानीका कारण अहिले रोपाइँ बढेर ३५ प्रतिशत पुगेको हो।
उनका अनुसार सिक्टा सिँचाइ आयोजना र भूमिगत पानीको सुविधा भएका क्षेत्रमा रोपाइँ भइरहेको भए पनि जिल्लाका अधिकांश किसान अझै आकाशे पानीकै प्रतीक्षामा छन्। समयमै मनसुन सक्रिय हुन नसक्दा नेपालगन्ज र खजुरा क्षेत्रमा सबैभन्दा कम रोपाइँ भएको उनले जानकारी दिइन्।
पानीको अभावका कारण असारको दोस्रो सातादेखि मात्रै रोपाइँ सुरु भएको हो। हालसम्म रोपिएका अधिकांश खेतमा सिँचाइ आयोजनाको पानी वा भूमिगत पानी प्रयोग गरिएको कृषि ज्ञान केन्द्रले जनाएको छ।
सूचना अधिकारी शर्माले समयमै वर्षा नहुँदा मसिनो र मध्यम जातका धान रोप्ने किसान बढी प्रभावित भएको बताइन्। तर मोटो धान खेती गर्ने किसानलाई केही ढिलो वर्षा भए पनि खासै समस्या नपर्ने उनको भनाइ छ।
“गत साता एक दिन राम्रो वर्षा भएको थियो, त्यसपछि उल्लेखनीय वर्षा भएको छैन। अधिकांश किसान अझै पनि आकाशतर्फ हेरेर पानीको प्रतीक्षामा छन्,” उनले भनिन्।
कृषि ज्ञान केन्द्रका अनुसार बाँकेमा अधिकांश किसानले राधा–४ मोटो धान तथा केही भारतीय हाइब्रिड जातका धान लगाउँदै आएका छन्। जिल्लाको कुल ५५ हजार ८२६ हेक्टर खेतीयोग्य जमिनमध्ये ३३ हजार ७८० हेक्टरमा धान खेती हुँदै आएको छ।
केन्द्रका अनुसार यस वर्ष रोपाइँ केही ढिलो भए पनि बाँकेमा परम्परागत रूपमा ढिलो धान रोप्ने चलन रहँदै आएको छ। विगतमा पनि किसानले भदौको पहिलो सातासम्म धान रोपाइँ गर्ने गरेका छन्।
हालसम्म कोहलपुर नगरपालिका, बैजनाथ गाउँपालिका र राप्तीसोनारी गाउँपालिकामा सबैभन्दा बढी रोपाइँ भएको छ। नहरको सुविधा भएका केही क्षेत्रमा पनि बिउ ढिलो राख्ने परम्पराका कारण खेतमा पानी हुँदाहुँदै रोपाइँ हुन नसकेको कृषि ज्ञान केन्द्रले जनाएको छ।
Discussion about this post