बाँके, असार २५ गते ।
नेपालगन्जस्थित जमुनाहा नाकामा सशस्त्र प्रहरीले एक किलो आलु र प्याज समेत ल्याउन दिएको छैन । फलफूल, खाने तेल, चिसो पेय पदार्थमा समेत सशस्त्र प्रहरीले कडाई गरेको छ, तर विहीवार भन्सार छलि गरेर ल्याइएका करिब १० लाख १७ हजार ८ सय ५७ रुपैयाँ बराबरका विभिन्न सामान बाँके प्रहरीले बरामद गरेको छ ।
फलफूल, लत्ताकपडा, सुर्तिजन्य पदार्थ, बल्ब (चिम), खाद्यान्न तथा चिसो पेय पदार्थ (कोक र माउन्टेन ड्यु लगायतका सामग्री बरामद गरी आवश्यक कारबाहीका लागि नेपालगन्ज भन्सार कार्यालयमा पठाइएको जिल्ला प्रहरी कार्यालयले जनाएको छ ।
एकै दिन यति ठूलो परिमाणमा सामान बरामद हुनुले नाकामा खटिएका सुरक्षाकर्मीको कामको पर्दाफास भएको छ । दिउँसोमा कडाई गरेको देखाउने र रातको समयमा तस्करी गर्नेलाई सहयोग गर्दै आएको भन्ने आरोपलाई उक्त बरामद सामानले पुष्टि गरेको छ । ‘यो घटनाले सीमा सुरक्षाको प्रभावकारिता माथि गम्भीर प्रश्न खडा गरेको छ,’ नाम उल्लेख नगर्ने शर्तमा एक सर्वसाधारणले भने ।
भारतसँग सीमा जोडिएको प्रमुख प्रवेशद्वार जमुनाहा नाका जोड्ने मुल सडकमा नेपाल प्रहरी र सशस्त्र प्रहरीको चार ठाउँमा चेक पोष्ट छ । जमुनाहामा नेपाल प्रहरी र सशस्त्र प्रहरीले संयुक्त रुपमा चेकजाँच गर्छन् । त्यसको दुई सय मिटर उत्तरमा पनि नेपाल प्रहरी र सशस्त्र प्रहरीको संयुक्त चेक पोष्ट छ भने नेपालगन्ज भन्सार कार्यालयको अगाडी नेपाल प्रहरीले चेक गर्छ । यता चौलिका चोकमा पनि नेपाल प्रहरी र सशस्त्र प्रहरीले संयुक्त रुपमा चेकजाँच गर्दै आएका छन् । तै पनि भारी परिमाणको अवैध सामान कसरी नेपालगन्ज भित्रिन्छ ? यो विषयले नाकामा खटिने सुरक्षाकर्मी र तस्करको मिलोमतो छ भन्ने प्रमाणित गरेको सर्वसाधारण बताउँछन् । ‘नाकामा खटिने सुरक्षाकर्मीको आँखा छलेर सामान भित्र्याउने कल्पनासमेत गर्न सकिदैन । भित्र्याउने कामको त कुरै नगरौँ,’ सर्वसाधारणले भने ।
बाँके प्रहरीले नेपालगन्जबाट भारी परिमाणको सामान बरामद गरेपछि यो विषय बहसको केन्द्र बनेको छ ।
सीमामा निगरानी प्रभावकारी भएको भए यस्ता सामान नेपालगन्जसम्म पुग्न सक्ने चान्स थिएन । तस्करीको श्रृंखला केवल भरिया वा साना कारोबारीमा सिमित नभई तस्करको संगठित सञ्जाल सक्रिय भएको सर्वसाधारणको भनाई छ । ‘सानोतिनो कारोवारीको वसको कुरा होइन, यसमा तस्करीको ठूलै संजाल सक्रिय छ भन्ने प्रमाणित गरेको छ,’ नाकास्थित एक सर्वसाधारणले अनलाइन खोजखवरसँग भने ।
सुरक्षा र भन्सार संयन्त्रले सीमामै अवैध सामान रोक्नु पर्ने भए पनि सामान शहरभित्र प्रवेश गरिसकेपछि मात्र बरामद हुने क्रम दोहोरिँदै आएको छ । स्थानीयले सीमा क्षेत्रको निगरानीमाथि स्वतन्त्र छानबिन गर्नुपर्ने माग गरेका छन् । सर्वसाधारण भन्छन्, ‘सीमावर्ती क्षेत्रमा समय समयमा हुने अनुगमनलाई थप प्रभावकारी बनाउनु पर्छ ।
गृहमन्त्री स्वयंले जमुनाहा नाका तथा बाँकेका विभिन्न संवेदनशील सीमा क्षेत्रको आकस्मिक स्थलगत निरीक्षण गर्नुपर्ने देखिन्छ ।’ प्रश्न अहिले पनि उही छ, ‘सीमामा रहेका अनेकौं चेकपोष्ट पार गरेर अवैध सामान नेपालगन्जसम्म कसरी पुग्छ ? यसको निष्पक्ष छानबिन र जिम्मेवार निकायको जवाफदेहिताले मात्रै सार्वजनिक शंका मेटाउन सक्ने देखिन्छ ।
Discussion about this post