खोजखबर संवाददाता
बाँके माघ ५ गते ।
नेपालगन्ज उपमहानगरपालिका-१७ का मोहम्मद शेर बागवानले २०७१ सालमा १४ धुर जग्गा किने । जग्गा आफ्नो नाममा पास पनि भयो । जग्गाधनीका आफन्तले बाँकी रहेको जग्गा विक्रीवितरण बन्द गर्न माग गर्दै मालपोत कार्यालयमा निवेदन दिए । जग्गा रोक्का भयो । त्यही संगोलमा बागवानको जग्गा पनि रोेक्का भयो । विक्री भइसकेको जग्गा रोक्का गर्ने जग्गाधनीका आफन्तको चाहना पनि थिएन । तर त्रुटिबस भयो ।
बागवानले तत्काल जिल्ला प्रशासन कार्यालयमा उजुरी दिए । तत्कालिन सिडियो वेदप्रकाश लेखकले पनि मालपोतबाट त्रुटि भएको भन्दै बागवानको जग्गा फुकाउन २०७१ मंसिर ११ गते पत्र लेखे । त्यही पत्र लिएर बागवान मालपोत कार्यालय पुगे । मालपोतका कर्मचारीले पत्र बुझदै तपाईको जग्गा फुकुवा गरिदिन्छौ भने । त्यसैको विश्वासमा बागवान ढुक्क भए । २० दिन अघि उनलाई त्यही जग्गा धितोमा राखेर पैसा निकाल्नु पर्ने भयो । मालपोत कार्यालय पुगे । तर जग्गा अझै फुकुवा नभएको पाइएपछि उनी अहिले मालपोत कार्यालय धाएको धाइछन् ।
मालपोतका कर्मचारीले कहिले जिल्ला प्रशासन पठाउछन् त कहिले भोलि भन्दै टार्दै आएका छन् । पछिल्लो समय यहाँसम्मकी मालपोतका कर्मचारीले सिधै घुस मागेपछि वागवान घुस्या कर्मचारीको विरोधमा आन्दोलनमा उत्रिएका छन् । ती कर्मचारीले महंगो जग्गा रहिछ ४०-५० हजार रुपैया दिए तत्काल फुकुवा गरिदिने बताएका थिए । नेपाल मुस्लिम समाज विकास चेतना केन्द्रका अध्यक्ष समेत रहेका वागवान सोमबार सेवा लिन कार्यालय जाँदा ढिलासुस्ति भएको, ढिलासुस्तिको कारण खोज्दै जादा आफै सँग कर्मचारीले घुस मागेको बताए ।
घुस मागेको बारे निमित्त कार्यालय प्रमुख अमर राज सेजुवालसँग गुनासो गर्दा उनले पनि कर्मचारीलाई मिलाउनुस् भनेपछि आफूहरु विरोधमा उत्रिएको वागवानले बताए । वागवान सहित महिला अधिकारकर्मी रुबि खान लगायत सेवाग्राहीहरु मालपोतको मूल गेटमा सोमबार दिउसो देखि धर्ना बसेका छन् ।
उनीहरुले भ्रष्टाचार बिरुद्ध नारावाजी गर्नुका साथै भ्रष्टाचार बिरुद्ध प्लेकार्ड बोकेर बसेका छन् । भ्रष्टाचार बिरुद्ध कार्यालय प्रमुख बाट प्रतिबद्धता नआए सम्म विरोधको कार्यक्रम जारी रहने उनीहरुले बताएका छन् । यसबारेमा निमित्त कार्यालय प्रमुख अमर राज सेजुवालसँग बुझ्न खोज्दा उहाँले सिधै इन्कार गरिदिनुभयो । अनलाइन खोजखवरलाई उहाँले कार्यालयभित्र भिडियो नलिन समेत धम्की दिनुभएको छ ।
Discussion about this post