खोजखबर संवाददाता
बाँके भदौ २५ गते । बाँके जिल्लामा पनि डेंगुको संक्रमण भेटिएको भन्दै सावधानी अपनाउन भेरी अस्पतालले आग्रह गरेको छ ।
जिल्लामा डेंगु रोगको संक्रमण भेटिएको छ । अहिलेसम्म जिल्लामा सात जना बिरामीमा डुेंगुको संक्रमण भेटिएको भेरी अस्पताल नेपालगन्जले जनाएको छ । बाँकेका १ जना र अन्य जिल्लाका ६ जना गरि ७ जनालाई डेंगु संक्रमण भएको पाईएको छ । अस्पतालमा भेटिएका डेंगुका बिरामीमा बर्दिया, कैलाली, पाल्पाका एक(एक जना र बुटवलका तीन जना रहेका अस्पताल स्रोतले जनाएको छ । बाहिरी जिल्लाबाट नेपालगन्ज आएका व्यक्ति बिरामी भई अस्पताल आउँदा डेंगु रोगको संक्रमण भएको पाईएको हो । बाहिरी जिल्लाबाट उपचारमा आउनेमा डेंगु पाईएको छ ।
जिल्लामा भाइरल बिरामीको संख्या बढेको अस्पतालले जनाएको छ । डेंगुको डरका कारण भाइरल संक्रमण हुनेहरू पनि उपचारका लागि अस्पताल पुग्ने गरेका छन् । स्थाननीयले सम्बन्धित निकायसंग डेंगुको प्रकोप रोक्कन विभिनन कदम चाल्न माग गरेका छन् ।
ज्वरो आउने, टाउको दुख्ने, जीउ दुख्ने, रुघाखोकी लाग्ने, ब्लडप्रेसर कम हुने डेंगुका लक्षण हुन् । पछिल्लो ढेड महिनामा डेंगुबाट चार जनाको मृत्यु भइसकेको छ । बढ्दो शहरीकरणसँगै प्लाष्टिकको अव्यवस्थित प्रयोग बढ्नुलाई डेंगुे संक्रमण बढ्नुको एउटा मुख्य कारण मानिएको छ । बगैंचा, करेसाबारी, छत, घर भित्रैका भाँडामा रहेका पानीमा यो जातका लामखुट्टे सक्रिय रहन्छन् । त्यसैले घर तथा घर वरपर पानी जम्न नदिन अस्पतालले आग्रह गरेको छ । उच्च ज्वरो आउने, शरीर दुख्ने, बान्ता हुने, जस्ता समस्या देखिएमा तुरुन्तै अस्पताल जान र यसबाट हुन सक्ने समस्या कम गर्न स्वास्थ्यकर्मीको सुझाव छ ।
Discussion about this post