लक्ष्मी तिमिल्सेना
बाँके भदौ २६ गते । विगतको इतिहास हेर्ने हो भने खजुरा क्षेत्र फुटबलमा सक्रिय थियो । यहाँ थुप्रै खेलाडीले राष्ट्रिय स्तरमा आफनो प्रतिभा मार्फत बाँकेलाई चिनाएका थिए तर अहिले त्यो अवस्था छैन । अब फेरी योगिनी कपले स्थानीय स्तरबाट राष्ट्रिय स्तरका प्रतिभा जन्माउने विश्वास छ ।
नेपालगन्ज, भदौ २६ गते
बाँकेको पश्चिम क्षेत्रमा हुन लागेको सर्वाधिक पुरस्कार राशीको फुटबल योगिनी कप फुटबल प्रतियोगितालाई नेपाल आईस वियरले मुख्य प्रायोजन गर्ने भएको छ ।
बिहिबार नेपालगन्जमा भएको पत्रकार सम्मेलनमा सिजी ब्रुअरी(नेपाल) प्राली र आयोजक सहयोग आवाज नेपालले सम्झौता पत्रमा हस्ताक्षर गरेका छन ।
प्रतियोगिता संयोजक तरिन्द्र बहादुर थापा र सिजी ब्रुअरी(नेपाल) प्रालीका म्यानेजर उमेश निरौलाले सम्झौता पत्रमा हस्ताक्षर गरेका थिए ।
बिहिबारको सम्झौता पश्चात प्रतियोगिताको नाम नेपाल आइस योगिनी कप फुटबल प्रतियोगिता हुने भएको छ । सिजी ब्रुअरी(नेपाल) प्रालीका म्यानेजर उमेश निरौलाले सिजी ब्रुअरी खेलकुदको विकासका लागि सधै अग्रसर भएर लागेको बताउनु भयो ।
नेपालका विभिन्न स्थानमा भैरहेको फुटबल प्रतियोगितामा सिजीले प्रायोजन गर्दै आएको बताउँदै निरौलाले भन्नु भयो, ‘सिजी फुटबलको विकासमा सधै सहयोग गर्न तयार छ । हामीले देशका विभिन्न खेलकुद प्रतियोगिता र सामाजिक कार्य गर्दै आएको छौं । आज बाँकेको खेलकुदमा उर्वर मानिएको क्षेत्रमा हुन लागेको प्रतियोगितामा प्रायोजन गर्न पाउँदा खुसी छौं । यसले प्रतियोगिताको स्तर बढनुका साथै खेलाडीले अवसर पाउनेछन भन्ने विश्वास लिएको छौं ।’ सिजीसँगको सहकार्यले खजुरा क्षेत्रबाट राष्ट्रिय स्तरका प्रतिभा जन्मने आसा गरेको निरौलाले पत्रकार सम्मेलनमा बताउनु भएको थियो ।
खजुरा–२ गौघाट स्थित योगिनी उच्च माविको खेल मैदानमा प्रतियोगिता हुदैछ । प्रतियोगितालाई खजुरावासी र विदेशमा रहेका युवाहरुले सहयोग गरिरहेको प्रतियोगिता संयोजक तरिन्द्र बहादुर थापाले बताउनु भयो ।
पत्रकार सम्मेलनमा बोल्दै थापाले भन्नु भयो, ‘आज सिजी ब्रुअरी (नेपाल) प्रालीको नेपाल आइससँग प्रतियोगिताको मुख्य प्रायोजन बारे सार्वजनिक गर्न पाउँदा हामीले खुसी महशुस गरिरहेको छौ । नेपाल आइससँगको सम्झौता पछि प्रतियोगिताले थप उचाइ हासिल गर्ने हामीले विश्वास लिएका छौं ।’ प्रतियोगितामा गरिएको सम्झौता रकम भने आपसी सहमतीमा गोप्य राख्ने निर्णय गरेको थापाले बताए । तर सम्झौताले ग्रामिण क्षेत्रमा हुन लागेको फुटबलको विकासमा नयाँ इतिहास रच्ने उहाँले बताउनु भयो ।
यसैगरी प्रतियोगितामा सहभागी हुने योगिनी माविको ‘ए’ टिमलाई म्यानेजर उमेश निरौलाले जर्सी प्रायोजन गरेका छन । योगिनीको ‘बी’ टिमलाई निर्देशक, समाजसेवी, कलाकार खजुरा गाउँपालिका निवासी शेखर खनालले जर्सी र खेलकुद सामाग्री प्रायोजन गरेका छन ।
बिहिबार भएको पत्रकार सम्मेलनमा अखिल नेपाल फुटबल संघका सदस्य एवम प्रशिक्षक सानु तामाङले योगिनी कप फुटबलले करियर बनाउन चाहने युवाहरुका लागि थप हौसला प्रदान गरेको बताए ।
बाँके जिल्ला फुटबल संघको प्राविधिक सहयोगमा गर्न लागिएको यस प्रतियोगितामा बाँके र बर्दियाका गरी ८ वटा फुटबल क्लबले प्रतिस्पर्धा गर्नेछन । प्रतियोगिता सविधान दिवसको अवसर पारेर असोज ३ गते देखी सुरु भइ असोज ७ गते सम्म चल्नेछ ।
अनुमानित ३ लाख ५० हजार बजेट रहेको प्रतियोगितामा प्रथम हुने क्लबले ५० हजार, दोस्रो हुनेले २५ हजार नगद पुरस्कार, ट्रफी, मेडल र प्रमाणपत्र प्रदान गरिनेछ ।
प्रतियोगिताको उत्कृष्ट खेलाडीलाई १० हजार, विधागत रुपमा उत्कृष्ट गोलकिपर, फरवार्ड, मिडफिल्डर, डिफेन्स र प्रशिक्षक जनही ५ हजार प्रदान गर्ने प्रतियोगिता संयोजक थापाले बताउनु भयो ।
फुटबल पछिल्लो समय संसारभर लोकप्रिय खेलकुदको रुपमा अगाडी बढेको छ । विगतको इतिहास हेर्ने हो भने खजुरा क्षेत्र फुटबलमा सक्रिय थियो । यहाँ थुप्रै खेलाडीले राष्ट्रिय स्तरमा आफनो प्रतिभा मार्फत बाँकेलाई चिनाएका थिए, थापाले भन्नु भयो, ‘पछिल्ला समय नयाँ पुस्ताले भने त्यो सफलता पाउन सकेको छैनन । खेलमात्र होइन युवाहरु पछिल्लो समय लागुपदार्थ दुव्र्यसनमा फसेर आफनो अमुल्य समय बर्बात पारिरहेका छन । यस्ता समस्याबाट समाज पिडित भैरहेको बेला हामीले योगिनी कप फुटबल प्रतियोगिताको सुरुआत गर्दैछौं ।
जसले खजुरा क्षेत्रमा घट्दै गएको फुटबलको लोकप्रियता बढाउने र कुलतमा लागेका युवालाई खेल मार्फत समाज विकासमा लाग्न सहयोग गर्नेछ । साथै फेरी योगिनी कपले स्थानीय स्तरबाट राष्ट्रिय स्तरका प्रतिभा जन्माउने विश्वास छ ।’ थापाले अगाडी भन्नु भयो, ‘बाँकेको गौघाटमा अहिले सम्म स्तरीय फुटबल प्रतियोगिता भएको छैन । राम्रो खेलाडी उत्पादन गर्ने क्षेत्र भएर पनि फुटबलमा खजुरा क्षेत्र पछि परेको छ । फुटबल स्थानीय पर्यटन प्रवद्र्धन र खेलको विकासमा महत्वपुर्ण साबित भैसकेको छ । तर नियमित रुपमा प्रतियोगिता हुदैनन । त्यसको अभावलाई कम गर्न प्रतियोगिता गरिएको हो ।’
Discussion about this post