सल्यान चैत २६ गते ।
सल्यानको शारदा नगरपालिका–१० पैयाखर्कस्थित जनता प्राथमिक विद्यालयका विद्यार्थी खुला चौरमा बसेर पढ्न बाध्य छन् । हावाहुरीले विद्यालय भवनको छाना (कर्कट पाता) फालेपछि विद्यार्थीलाई ६ महिनादेखि खुला चौरमा बसेर पढनुपर्ने बाध्यता भएको हो ।मर्मतका लागि रकम नहुँदा छाना राख्न नसकिएको प्रधानाध्यापक डम्मरबहादुर चलाउनेले बताए ।
उनका अनुसार कक्षाकोठाको पर्खालसमेत चर्किएको छ । ‘खुला चौरमा पढाउँदा धुलोले बालबालिकामा स्वास्थ्य समस्या देखिन थालेको छ,’ उनले भने,‘विद्यालय सडक नजिकै भएकाले गाडी वारपार गर्दा विद्यालय क्षेत्र नै धुलाम्मे हुने गरेको छ ।’ कक्षा ५ सम्म पढाइ हुने विद्यालयमा ३० विद्यार्थी अध्ययनरत छन् ।
समयमै भवन मर्मत नहुँदा पठनपाठनमा समस्या भएको विद्यालय व्यवस्थापन समितिका अध्यक्ष वीरबहादुर विकले बताए । नगरपालिकाले भवन मर्मतमा बेवास्ता गरेको उनको गुनासो छ । फाइल फोटो
Discussion about this post