बाँके जेठ २९ गते ।
बाँके जिल्ला पावरलिफ्टिङ संघको अध्यक्षमा दन्त चिकित्सक डा. प्रतिक श्रेष्ठ चयन भएका छन् । बाँकेमा रहेका खेलकुद हस्तीहरुको उपस्थितिमा भएको एक कार्यक्रममा डा. श्रेष्ठलाई अध्यक्ष चयन सँगै जिम्मेवारी हस्तान्तरण गरिएको हो ।
नयाँ कार्यसमिति चयन तथा पद हस्तान्तरण कार्यक्रमका प्रमुख अतिथि ओलम्पियन सुरेन्द्र हमालले पावरलिफ्टिङ संसारको सवैभन्दा पुरानो खेल भएको बताउँदै नयाँ कार्यसमितिले बाँकेमा पावरलिफ्टिङलाई उचाईमा पुर्याउने विश्वास व्यक्त गरे । उनले चार वटा विधा अन्तरगत पावरलिफ्टिङ पनि एउटा विधा भएको बताउँदै उनले डा. श्रेष्ठको अगुवाईमा पावरलिफ्टिङले बाँकेलाई चिनाउने विश्वास ब्यक्त गरे ।
नेपालगन्ज उपमहानगरपालिका वडा नं. २ का अध्यक्ष मनोज श्रेष्ठले पावरलिफ्टिङको नयाँ कार्यसमिति चयनसँगै बाँकेमा ३ वटा आइरन खेल हुने बताए । उनले नेपालगन्जमा खेलकुदको ४५ वर्षे इतिहास भएको बताउँदै संघलाई केन्द्रिय संघसँग जोड्नुपर्ने धारणा राखे । ‘पावरलिफ्टिङ सवै खेलको जननी हो । शरिर बलियो भए मात्र अरु खेल खेल्न सकिन्छ । पावरलिफ्टिङले शरिर बलियो बनाउने भएकोले यो खेल मानिसलाई स्वस्थ राख्न मद्दत गर्छ । यो खेलले खेलाडीलाई अनुशासित बनाउन समेत मद्दत गर्दछ,’ उनले भने ।
नव निर्वाचित अध्यक्ष डा. प्रतिक श्रेष्ठले शारिरिक शक्तिमात्र पावरलिफ्टिङ नभएको बताउँदै अनुशासन, दृढता र निरन्तर प्रयास नै वास्तविक शक्ति भएको बताए । उनले भने, ‘अध्यक्षको जिम्मेवारी लिइरहँदा मैले यसलाई पदको रुपमा मात्र लिएको छैन । बाँकेको कुना काप्चामा रहेका खेलाडीहरुको भविष्य निर्माण गर्ने अवसरको रुपमा लिएको छु ।’
उनले खेलाडीकोम बृत्ति विकासका लागि विभिन्न थरिका योजना सार्वजनिक समेत गरे ।
उनले खेलाडीको बृत्ति विकासका लागि प्रशिक्षण, खेल सामग्री ब्यवस्थापनका लागि तीनै तहका सरकारसँग समन्वय गर्ने बताए । ‘बाँकेका जिल्लाका ग्रामिण क्षेत्रमा लुकेर रहेका प्रतिभालाई राष्ट्रिय तथा अन्तरर्राष्ट्रिय स्तरसम्म पुर्याउन विभिन्न खालका खेलकुद प्रतियोगिता आयोजना गरिने छ,’ उनले भने, ‘संघलाई पादर्शी बनाइने छ । अग्रजहरुको सल्लाह र युवाहरुको उर्जालाई सँगसँगै लिएर अगाडी बढ्ने छौँ ।’
भेलाले संघको उपाध्यक्षमा पुनमकुमारी विक, सचिवमा सौरभ कर्माचार्य, सह–सचिवमा रिहान कुरेशी र कोषाध्यक्षमा किरणकुमार श्रेष्ठलाई चयन गरेको छ । समितिको सदस्यमा अनिलसिंह सिजापती, दिपेन्द्र सिंह, दिपेन्द्र शर्मा, चन्द्र कँडेल, अमृत राना, सुनिल भाट, करन बाडिया, सिवानी पौडेल, प्रकृति श्रेष्ठ, सुरेश थापा र अमित मल्ल चयन गरेको छ ।
संघको बरिष्ठ सल्लाहकारमा लक्ष्मण केसी र लवराज श्रेष्ठलाई मनोनित गरिएको अध्यक्ष डा. श्रेष्ठले जानकारी दिए ।
भेलामा जिल्ला खेलकुद विकास समिति बाँकेका कार्यालय प्रमुख सन्तोषकुमार श्रेष्ठ, पूर्व बडिबिल्डिङ खेलाडी सुरेश श्रेष्ठ विशेष अतिथि र नासिर अहमद शेख, लवराज श्रेष्ठ र लक्ष्मण केसी अतिथिका रूपमा सहभागी भएका थिए ।
Discussion about this post