बाँके, जेठ २८ गते।
किसानसँग पालिका प्रमुख कार्यक्रमअन्तर्गत बाँकेको बैजनाथ गाउँपालिकाले पालिकाभित्रका किसानलाई ७० प्रतिशत अनुदानमा डिजिटल तराजु वितरण गरेको छ।
चालु आर्थिक वर्ष २०८२/८३ को बजेट कार्यक्रममार्फत गाउँपालिकाले ७६ जना किसानलाई ७६ थान डिजिटल तराजु वितरण गरेको हो।
आयोजित कार्यक्रममा गाउँपालिका अध्यक्ष प्रकाशबहादुर शाही, उपाध्यक्ष निर्मला रोकाय, कार्यपालिका सदस्य तथा आर्थिक विकास समितिका संयोजक फरिदुद्धिन हल्वाई र कृषि शाखा प्रमुख प्रमोदकुमार विश्वकर्माले किसानलाई डिजिटल तराजु हस्तान्तरण गरेका थिए।
कार्यक्रमलाई सम्बोधन गर्दै अध्यक्ष शाहीले किसानले उत्पादन गरेका कृषि उपजको तौल मापनलाई पारदर्शी, विश्वसनीय र व्यवस्थित बनाउन डिजिटल तराजु वितरण गरिएको बताए। उनले डिजिटल तराजुको प्रयोगले किसान र कृषि उपज खरिदकर्ताबीच विश्वास बढ्नुका साथै उत्पादनको बजारीकरणमा समेत टेवा पुग्ने विश्वास व्यक्त गरे।
“किसानले उत्पादन गरेको वस्तुको सही तौल निर्धारण हुँदा किसान र खरिदकर्ताबीच विश्वासको वातावरण बन्छ। यसले कृषि उत्पादनको बजारीकरणलाई थप सहज र प्रभावकारी बनाउनेछ,” अध्यक्ष शाहीले भने।
उनका अनुसार किसानसँग पालिका प्रमुख कार्यक्रममार्फत स्थानीय सरकारले किसानलाई विभिन्न आधुनिक कृषि प्रविधिसँग जोड्ने तथा अनुदानमा कृषि सामग्री उपलब्ध गराउने कार्यलाई निरन्तरता दिइरहेको छ। उनले गाउँपालिकाबाट वितरण गरिएका कृषि उपकरण तथा सामग्रीको सही सदुपयोग गर्न किसानलाई आग्रह पनि गरे।
गाउँपालिका कृषि शाखाका कर्मचारी सचिन मेघनाथका अनुसार डिजिटल तराजु प्राप्त गर्न ९६ जना किसानले निवेदन दिएका थिए। तीमध्ये छनोट प्रक्रियामार्फत ७६ जना किसानलाई जनही एक थान डिजिटल तराजु वितरण गरिएको हो।
डिजिटल तराजु प्राप्त गरेपछि किसानहरू उत्साहित भएका छन्। बैजनाथ–२ का किसान दिनेश चौधरीले डिजिटल तराजुले कृषि उपजको तौल गर्न सहज हुने भन्दै खुसी व्यक्त गरे।
गाउँपालिकाको कृषि शाखाका अनुसार चालु आर्थिक वर्षभित्र किसानसँग पालिका प्रमुख कार्यक्रममार्फत अन्य कृषि यान्त्रीकरणका सामग्रीसमेत वितरण गर्ने योजना रहेको छ।
Discussion about this post