बाँके बैशाख १० गते ।
मधुबन नगरपालिका–५ ताराताल बर्दियाका तुलबहादुर गुरुङ दम्पत्ती उपचारका लागि विहीवार बेलुकी करिव ७ बजे भेरी अस्पताल आए । रुघाखोकी, ज्वरो आउने, शरिर दुख्ने र झाडापखाला लागेपछि उनीहरु कोरोना परीक्षणका लागि ८ बैशाखमा भेरी अस्पतालमा स्वाब दिए । ९ बैशाखमा दुवै जनाको कोरोना रिपोर्ट पोजेटिभ आयो ।
स्वाब दिएर घर गएका उनीहरुको मोवाइलमा कोरोना रिपोर्ट पोजेटिभ आएको एसएमएस आयो । दुवै जना हतार हतार नेपालगन्जस्थित भेरी अस्पताल आए । दुवै जनाले बेडका लागि त्यहाँ कार्यरत चिकित्सक, स्टाफ नर्स र अन्य स्वास्थ्यकर्मीसँग हारगुहार गरे । तर, उनीहरुको विन्ति कसैले सुनेनन् । आइसोेलेशनको बाहिर रहेको बेडमा बसेका गुरुङ दम्पत्ती बेड पाउने आशामा त्यहिँ बसिरहे ।
रातीको ११ बजेसम्म पनि आइसोलेशनमा उनीहरुले बेड पाएका थिएनन् । नयाँ पत्रिकाकर्मी त्यहाँ पुग्दा उनीहरुले हारगुहार गर्दै भने, ‘सास फेर्न गाह्रो भइरहेको छ सर जसरी भए पनि बेड मिलाई दिनु पर्यो । नत्र हामीलाई गाह्रो हुन्छ ।’
तीन घण्टाको पर्खाई पछि बार बर्दिया नगरपालिकाकी सिर्जना गिरी सुवेदीले आइसोलेशनमा बेड पाइन् ।
उनको स्वास्थ्य अस्वथा खराव भए पनि लामो पर्खाईपछि मात्र बेड पाएको उनका आफन्त सौरभ गिरिले बताए । ‘बेड नपाएर हैरान भइसकेको थियो । अन्यत्रबाट बेड खोजेर बल्लतल्ल ब्यवस्था मिलाइयो,’ उनले भने ।
सिरियस विरामीका लागि समेत बेड नभएको अस्पतालका प्रमुख मेडिकल सुपरिटेन्डेन्ट डा. प्रकाशबहादुर थापाले बताए ।
उनले आइसोलेशनको कुनाकाप्चामा समेत बेड राखेर उपचार गरिरहेको बताए । ‘आइसोलेशनमा खुट्टा राख्ने ठाउँसमेत छैन । अव थप विरामी भर्ना गर्न सक्ने अवस्था छैन । यो भन्दा जटिल अवस्था आउन सक्छ,’ उनले चेतावनी दिँदै भने, ‘भेरी अस्पतालले मात्र धान्न सक्दैन । यो भन्दा जटिल अवस्था आउन सक्ने सम्भावना छ । बेलैमा ध्यान पुर्याउनु पर्ने देखिन्छ ।’
नेपालगन्ज मेडिकल कलेज शिक्षण अस्पताल कोहलपुरका कोरोना आइसोलेशन वार्डका इन्चार्ज दिनेश श्रेष्ठले पनि विरामी भर्ना लिन बन्द गरेको बताए । अकस्मात संक्रमितको संख्या बढेको बताउँदै उनले हात उठाउन मात्र बाँकी रहेको स्पष्ट पारे । बेड खाली नभएको बेला विहीवारमात्र १५ जना संक्रमित थपिएका छन् ।
उनीहरुलाई कहाँ राख्ने हो भन्ने निक्र्यौल भइसकेको छैन,’ उनले भने, ‘अव हात उठाउन मात्र बाँकी छ । यसैगरि थपिने हो भने हात उठाउनु पर्ने हुन्छ ।’
बाँकेमा संक्रमितको संख्या दिनदिनै थपिदै गएको छ । विहीबार बाँकेमा तीन सय ८८ जनामा कोरोना पुष्टि भएको जिल्ला कोभिड–१९ संकट ब्यवस्थापन केन्द्रका फोकल पर्सन तेजबहादुर ओलीले जानकारी दिए । गोचाली खबर
Discussion about this post