बाँके, असार १४ गते ।
संघीय स्वास्थ्य तथा जनसंख्या मन्त्रालयले देशभर एन्टी–रेबिज भ्याक्सिनको अभाव नरहेको दाबी गरिरहे पनि नेपालगन्जस्थित भेरी अस्पतालमा पछिल्ला केही महिनादेखि रेबिजविरुद्धको खोपको चरम अभाव देखिएको छ। खोप अभावका कारण कुकुरले टोकेका बिरामीलाई निःशुल्क उपलब्ध गराइनुपर्ने भ्याक्सिनसमेत बाहिरबाट खरिद गरेर लगाउनुपर्ने अवस्था सिर्जना भएको अस्पतालले जनाएको छ।
अस्पतालका सूचना अधिकारी डा. संकेत रिसालका अनुसार दैनिक ५० भन्दा बढी सेवाग्राही कुकुरले टोकेको भन्दै एन्टी–रेबिज खोप लगाउन आउने गरेका छन्। तर अस्पतालमा खोपको मौज्दात नहुँदा उनीहरूलाई निजी औषधि पसलबाट खरिद गरेर ल्याउन आग्रह गर्नुपरेको उनले बताए।
खोप अभावले विशेषगरी विपन्न तथा आर्थिक अवस्था कमजोर भएका बिरामी बढी प्रभावित भएका छन्। अस्पताल विकास समितिको सहयोगमा केही मात्रामा खोप खरिद गरी निःशुल्क वितरण गरिए पनि आर्थिक स्रोतको अभावका कारण त्यसलाई निरन्तरता दिन नसकिएको डा. रिसालले जानकारी दिए।
भेरी अस्पतालका मेडिकल स्टोर प्रमुख भवानीप्रसाद यादवका अनुसार रेबिजविरुद्धको खोप अस्पतालले आफैं खरिद गर्ने व्यवस्था छैन। संघीय तथा प्रदेश सरकारबाट प्राप्त हुने डोज आवश्यकताअनुसार वितरण गर्ने गरिएको भए पनि पछिल्लो समय पर्याप्त आपूर्ति हुन नसकेको उनले बताए।
यता, निःशुल्क पाइने खोप खरिद गर्न बाध्य बनाइएको भन्दै सेवाग्राहीले असन्तुष्टि व्यक्त गर्दै अस्पतालमा विवादसमेत गर्ने गरेको ड्रेसिङ रुम इन्चार्ज कृष्ण बुढाथोकीले बताए। उनका अनुसार उपचार कक्षका कर्मचारीको जिम्मेवारी केवल खोप लगाइदिने मात्र भए पनि खोप अभावको आक्रोश उनीहरूले नै सामना गर्नुपरेको छ।
“निःशुल्क पाइने खोप किनेर ल्याउन भनियो भन्ने बुझाइले धेरै सेवाग्राही रिसाएर आउनुहुन्छ। हाम्रो काम त केवल सुई लगाइदिने हो,” बुढाथोकीले भने।
अस्पतालका अनुसार हाल दैनिक ७० देखि ७५ डोजसम्म एन्टी–रेबिज खोप आवश्यक पर्ने गरेको छ। तर मौज्दात सकिएकाले संघीय वा प्रदेश सरकारबाट थप आपूर्ति नआएसम्म निःशुल्क सेवा सञ्चालन गर्न नसकिने स्पष्ट गरिएको छ।
खोप अभावका कारण उपचारमा ढिलाइ हुने तथा आर्थिक रूपमा कमजोर बिरामी थप मारमा परेको भन्दै अस्पतालले सम्बन्धित निकायसँग तत्काल पर्याप्त परिमाणमा एन्टी–रेबिज खोप उपलब्ध गराउन आग्रह गरेको छ।
Discussion about this post