बाँके, असार ९ गते।
बढ्दो गर्मीका कारण बाँकेको नेपालगन्ज उपमहानगरपालिकाले सामुदायिक तथा संस्थागत विद्यालयमा पुनः तीन दिनका लागि पठनपाठन बन्द गर्ने निर्णय गरेको छ।
उपमहानगरपालिकाको शिक्षा महाशाखाका वरिष्ठ शिक्षा अधिकृत लोकेन्द्रबहादुर शाहीका अनुसार अत्यधिक गर्मीका कारण विद्यार्थीको स्वास्थ्य र नियमित पठनपाठनमा प्रतिकूल असर पर्न थालेपछि असार १० देखि १२ गतेसम्म विद्यालय बन्द गर्ने निर्णय गरिएको हो।
उनले जल तथा मौसम विज्ञान विभाग तथा अन्य सरोकारवाला निकायबाट प्राप्त सुझावका आधारमा विद्यार्थीको सुरक्षा र स्वास्थ्यलाई प्राथमिकतामा राख्दै उक्त निर्णय गरिएको जानकारी दिए। अत्यधिक तापक्रमका कारण विद्यार्थीलाई विद्यालय आवतजावतमा कठिनाइ हुने तथा स्वास्थ्य जोखिम बढ्ने सम्भावनालाई ध्यानमा राखिएको उनले बताए।
यसअघि पनि उपमहानगरपालिकाले अत्यधिक गर्मीकै कारण गत जेठ २६ देखि २९ गतेसम्म चार दिन विद्यालयमा विदा दिएको थियो।
हाल नेपालगन्ज क्षेत्रमा वर्षा नहुँदा तापक्रम लगातार बढिरहेको छ। चर्को गर्मीका कारण जनजीवन प्रभावित बन्दै गएको छ। तीन दिनको बिदापछि नेपालगन्जका विद्यालयहरू आगामी सोमबारदेखि पुनः सञ्चालनमा आउनेछन्।
Discussion about this post