शान्ति, सद्भाव र भाइचाराको कामनासहित आज ताजिया विसर्जन, मोहर्रम पर्व सम्पन्न

बाँके, असार १२ गते ।
शान्ति, सद्भाव र भाइचाराको सन्देश बोकेको मुस्लिम समुदायको पवित्र पर्व मोहर्रम शुक्रबार ताजिया विसर्जनसँगै सम्पन्न भएको छ। दस दिनसम्म विविध धार्मिक तथा सांस्कृतिक कार्यक्रमका साथ मनाइने यस पर्वको समापन नेपालगन्जको फुलटेक्रास्थित स्थानीय कर्बलामा ताजिया विसर्जन गरेर गरिएको हो।

केन्द्रीय मोहर्रम तथा कर्बला संरक्षण समितिका अनुसार मोहर्रमको अन्तिम दिन नगरका विभिन्न स्थानबाट ताजिया बोकेर निस्किएका जुलुसले बाजागाजासहित नगर परिक्रमा गर्दै स्थानीय कर्बलामा पुगेर ताजिया विसर्जन गरेका थिए।

मोहर्रम व्यवस्थापन समिति धमबोझिका अध्यक्ष मेराज अहमद हल्वाई (हिमालय)ले मोहर्रमले शान्ति, सद्भाव र धार्मिक सहिष्णुताको सन्देश दिने बताए। उनले ताजिया विसर्जन जुलुसमा मुस्लिम समुदायसँगै विभिन्न धर्म र समुदायका सर्वसाधारणको उल्लेखनीय सहभागिता रहेको जानकारी दिए।उनका अनुसार मोहर्रमको नवौं दिन ताजियालाई घर–घरमा स्थापना गरी आकर्षक ढंगले सजाइएको थियो। ताजियाको संरक्षणका लागि रातभर जाग्राम बस्ने परम्पराअनुसार स्थानीयवासी रातभर जाग्राम बसेका थिए भने सर्वसाधारणले सहरका विभिन्न स्थानमा पुगेर ताजियाको दर्शन तथा झिलिमिली सजावटको अवलोकन गरेका थिए।

मुस्लिम धर्मावलम्बीहरूले इराकको कर्बलामा शहादत प्राप्त गरेका पैगम्बर हजरत मोहम्मदका नाति हजरत इमाम हुसैन र हजरत इमाम हसनको सम्झनामा प्रत्येक वर्ष मोहर्रम पर्व मनाउने परम्परा रहेको छ। अरबी पात्रोअनुसार मोहर्रम महिनाको पहिलो दस दिनसम्म विविध धार्मिक कार्यक्रम आयोजना गरिन्छ।