बुटवल असार २ गते ।
लगातारको वर्षाका कारण लुम्बिनी प्रदेशका मुख्यसहित पहाडी सडकहरु अवरुद्ध भएका छन् । लुम्बिनी प्रदेशमा पूर्वपश्चिम राजमार्ग मंगलबार बिहानदेखि नै अवरुद्ध छ भने सिद्धार्थ राजमार्ग मंगलबार रातिदेखि अवरुद्ध छ। पूर्वपश्चिम राजमार्ग अन्तर्गत पर्ने बुटवल–नारायणगढ सडक खण्ड बिस्तारका क्रममा रुपन्देहीको देवदह चरंगेमा पूल निर्माणका लागि बनाइएको वैकल्पिक सडक र कल्भर्ट बाढीले बगाएको छ।
जसका कारण पूर्वपश्चिम राजमार्गको बुटवल–देवदह खण्डमा गाडी चल्न सकेका छैनन्। मालवाहक गाडीको लामो लाइन लागेको छ।
मंगलबार नै सिद्धार्थ राजमार्ग अन्तर्गत बुटवल–पाल्पा खण्ड अवरुद्ध भएको छ। सो सडक खण्डका विभिन्न ठाउँमा पहिरो झरेको लुम्बिनी प्रदेश ट्राफिक प्रहरी कार्यालय बुटवलले जनाएको छ। पाल्पाको तिनाउ गाउँपालिका–५ कालीमाटीमा मंगलबार साँझदेखि खसेको पहिरोले बाटो रोकेको छ भने पाल्पाको तानसेन–८ गौडेपुलमा बाढीले सडक बगाएको छ।
डुम्रे खोलाको बाढी र सडकमाथिबाट खसेको पहिरोले सडक जगैबाट बगाएको लुम्बिनी प्रदेश ट्राफिक प्रहरी कार्यालय बुटवलका डीएसपी डिल्ली नारायण पाण्डेले जानकारी दिए। उनका अनुसार वर्षाका कारण सो सडक सूचारु गर्नसकिने अवस्था छैन। सडक जगैबाट बगाएको र पहिरो खस्ने क्रम नरोकिएकाले सडक सूचारु गर्न अरु केही समय लाग्ने उनले बताए। यस्तै पाल्पाकै रिब्दीकोट गाउँपालिका–३ हार्थोकमा पनि पहिरो खसेपछि गुल्मी र अर्घाखाँचीको पूर्वी भेगबाट पाल्पा–बुटवलका लागि आउनेजाने गाडी बाटोमै अलपत्र परेका छन् ।
तानसेन–५ जरेपिपलमा पनि पहिरो खसेको छ। पाल्पाको राम्दीमै पहिरो खस्दा स्याङ्जा, वालिङ, पोखरा सडक पनि अवरुद्ध छ। पाल्पाको आर्यभञ्जाङ–रामपुर सडक पनि अवरुद्ध छ। कपिलवस्तुको गोरुसिङ्गे, अर्घाखाँचीको सन्धिखर्क सडक पनि अवरुद्ध छ। प्युठान–भालुवाङ सडकको खहरे खोलामा पहिरो खस्दा सडक खण्ड पनि अवरुद्ध भएको डीएसपी पाण्डेले जानकारी दिए।
अरु धेरै पहाडी सडकहरु अवरुद्ध भएको हुनसक्ने र भारी वर्षा भएका कारण पहिरो खस्ने सम्भावना रहेकाले अत्यावश्यकबाहेक यात्रा नगर्न उनले सुझाव दिए। लगातारको वर्षाका कारण ग्रामीण क्षेत्रका अधिकांश कच्ची सडकहरु बन्द भएपनि आधिकारिक सूचना आइनपुगेको उनले बताए।
Discussion about this post