बर्दिया, साउन १२ गते ।
बाँके युनेस्को क्लब, राधाकृष्ण जनसेवा केन्द्र र प्लान इन्टरनेशनल नेपालको साझेदारीमा सञ्चालित परियोजनालाई प्रभावकारी बनाउन बर्दियाको गुलरियामा उच्चस्तरीय संयुक्त व्यवस्थापन बैठक सम्पन्न भएको छ। बैठकले परियोजनाको अनुगमन, समन्वय र कार्यान्वयनलाई थप व्यवस्थित बनाउने निर्णय गरेको छ।
राधाकृष्ण जनसेवा केन्द्रका अध्यक्ष दिनेश श्रेष्ठ र बाँके युनेस्को क्लबका अध्यक्ष प्रवेज अली सिद्दिकीको संयुक्त अध्यक्षतामा भएको बैठकमा दुवै संस्थाका सञ्चालक समिति सदस्य तथा वरिष्ठ व्यवस्थापन टोली सहभागी थिए।
बैठकमा अन्तरसंस्थागत समन्वय सुदृढ बनाउने, संस्थागत सुशासन प्रभावकारी बनाउने र परियोजनाका गतिविधिको नियमित अनुगमन गर्दै समुदायमा दीर्घकालीन सकारात्मक प्रभाव पार्ने रणनीतिबारे छलफल भएको अध्यक्ष सिद्दिकीले बताए।
अध्यक्ष श्रेष्ठका अनुसार तथ्यांकको गुणस्तर सुधार, विश्वसनीय प्रगति प्रतिवेदन तयार गर्ने, स्रोत–साधनको प्रभावकारी परिचालन तथा फिल्डस्तरका गतिविधिलाई थप गुणस्तरीय बनाउने विषयमा पनि सहमति भएको छ।
बैठकले कन्सोर्टियमअन्तर्गत सञ्चालन हुने सबै गतिविधिमा एकीकृत संयुक्त ब्रान्डिङ लागू गर्ने, प्रत्येक महिना संयुक्त प्रगति समीक्षा तथा अनुगमन बैठक गर्ने र विषयगत प्रतिवेदन प्रणालीलाई एकरूप बनाउने निर्णय गरेको कार्यकारी निर्देशक रवि तुलाधरले जानकारी दिए।
त्यसैगरी, स्थानीय तहसँगको साझेदारी बलियो बनाउन र परियोजनाको साझा स्वामित्व सुनिश्चित गर्न बर्दियाका सातवटै पालिकामा नगरस्तरीय परियोजना शुभारम्भ बैठक आयोजना गर्ने निर्णय पनि गरिएको छ।
बैठकको अन्त्यमा सहभागीहरूले कन्सोर्टियम साझेदारीलाई प्रभावकारी नमुनाका रूपमा विकास गर्दै बालबालिका, किशोरकिशोरी र युवाको सुरक्षित भविष्यका लागि दिगो र गुणस्तरीय उपलब्धि हासिल गर्ने प्रतिबद्धता जनाएका छन्।
Discussion about this post