बाँके, साउन १० गते ।
डिभिजन वन कार्यालय बाँकेले आर्थिक वर्ष २०८२/८३ मा विभिन्न प्रजातिका १९७ वन्यजन्तुको उद्धार गरेको छ। उद्धार गरिएकामध्ये सबैभन्दा धेरै सर्प प्रजातिका १७० वटा रहेका छन्। तीमध्ये ७६ वटा कोब्रा (गोमन) हुन्।
डिभिजन वन कार्यालय बाँकेका वरिष्ठ वन अधिकृत सुशील सुवेदीका अनुसार उद्धार गरिएका सर्पमा ३६ वटा धामन, १९ वटा करेत, १३ वटा रसेल भाइपर, १० वटा अजिङ्गर, पाँच वटा पानी सर्प र एउटा राजगोमन छन्।
त्यसैगरी आठ–आठ वटा गोही र सुनगोहोरो, चार वटा चित्तल, तीन–तीन वटा नीलगाई र हुचिल तथा एक–एक वटा बँदेल, बाँदर, बाज र कालोबिरालोको उद्धार गरिएको उनले बताए।
सुवेदीका अनुसार घाइते, टुहुरा, बाटो बिराएर बस्तीमा पुगेका वा अन्य कारणले सङ्कटमा परेका वन्यजन्तुको उद्धार गरिँदै आएको छ। उद्धार गरिएका अधिकांश वन्यजन्तुलाई उपचारपछि बाँकेको राष्ट्रिय तथा सामुदायिक वनमा पुनःस्थापना गरिएको छ। केहीलाई बाँके राष्ट्रिय निकुञ्जमा पठाइने गरिएको उनले जानकारी दिए।
घाइते वन्यजन्तुलाई कार्यालयमै उपचार गरी पूर्ण रूपमा निको भएपछि मात्र प्राकृतिक वासस्थानमा छाड्ने गरिएको उनको भनाइ छ।
उनका अनुसार आहाराको अभाव, मानव गतिविधि बढ्नु, बाटो बिराएर बस्तीमा पस्नु तथा पानी पिउने क्रममा तालतलैया वा नहरमा फस्नेजस्ता कारणले वन्यजन्तु वासस्थानबाट बाहिरिने गरेका छन्।
डिभिजन वन कार्यालयको तथ्यांकअनुसार वन्यजन्तु उद्धारको संख्या हरेक वर्ष बढ्दो क्रममा छ। आर्थिक वर्ष २०८१/८२ मा १३८, २०८०/८१ मा ९९, २०७९/८० मा ४२, २०७८/७९ मा ३१, २०७७/७८ मा ३४ र २०७६/७७ मा १७ वन्यजन्तुको उद्धार गरिएको थियो।
Discussion about this post